Владата да каже како ќе ги троши парите од ММФ

Наместо општи фрази од типот за буџетски потреби, власта треба јасно да каже за кои проекти ќе се искористат 480 млн. евра

Соња Маџовска

За што ќе се користат 480 милиони евра, кои земјава ќе ги добие од ММФ, освен на Владата на никој друг не му е јасно. Аналитичарите, но и стопанствениците се во недоумица кога, како, колку и за што ќе се трошат парите што ќе треба некој и да ги враќа. Експертите велат дека финансиските власти дошле на нивното и бараат јавно извинување од нив, бидејќи после три години предупредувања и повици земјава да земе пари од ММФ, дури сега власта сфатила оти тие пари се најповолни. „Сега излезе дека ММФ е добар зајмувач. Владата треба јавно да ни се извини што не не' послуша навреме, нас експертите, кои постојано укажувавме дека, наместо да се задолжуваме скапо, треба да се земе кредит од ММФ“, вели професорот Ванчо Узунов. Тој смета дека министерот Ставрески треба да има доблест и да и' каже на јавноста за кои проекти конкретно ќе се трошат парите, а не да се даваат општи формулации од типот дека тие ќе се користат за буџетски потреби, каде што влегуваат и нивните плати. „Нормално е дека парите од ММФ ќе се користат за буџетски потреби, ама тука влегуваат и платите. Владата треба да не' убеди и увери дека овие пари паметно ќе се потрошат. Треба да се знае за кои проекти ќе бидат наменети, а најдобро е тоа да бидат проекти со кои тие пари ќе се вратат. Тоа е најефикасен начин. Владата очигледно не сака да каже за што ќе се трошат овие пари. Тоа е неодговорност и неотчетност. Идејата на Владата е да потроши многу пари за да осигури некакви економски перформанси пред редовните избори во 2012 година. Тоа е нејзината очигледна намера. Излегува дека им е потребна и еврообврзница, а тоа се убави пари без контрола“, вели Узунов.

И бизнис-заедницата ја услови Владата, ако парите од ММФ се искористат паметно ќе ја има нивната подршка, во спротивно нема.

„Трошењето на парите од ММФ ќе биде поддржано од бизнис-заедницата ако е во насока на инвестиции, инфраструктура и извоз, а само тогаш Владата ќе ја има нашата поддршка“, изјави вчера Бранко Азески, претседател на Стопанската комора на Македонија.

Власта, пак, упорно тврди дека парите од ММФ ќе се чуваат како резерва.

„Владата треба да ги чува како резерва, да ги троши по потреба, а ако има ризик за буџетот ќе се трошат за буџетски потреби. Овие пари се само резервна варијанта за земјата. Дополнително ќе се одлучува дали воопшто, кога и по колку пари ќе се повлекуваат“. Ова се дел од објаснувањата што ги слушнавме деновиве, а во кои нема ништо конкретно, односно само општи фрази и еден вид оправдувања зошто после три години сега излезе дека парите од ММФ биле ем поволни ем евтини за зајмување.

Македонија е прва земја-членка на ММФ што го користи овој нов инструмент од Фондот. Генералниот директор на ММФ, Доминик Штраус-Кан, во писмена изјава ја поздрави одлуката на Македонија да ја побараа оваа кредитна линија за претпазливост. „Многу сум задоволен што Македонија позитивно одговори на поканата што ја упатив до економиите што имаат здрави економски основи и политики да го искористат овој нов инструмент за зголемување на меѓународната доверба. Затоа јас имам намера што поскоро да побарам од Извршниот одбор на ММФ одобрување на барањето на Македонија за кредитна линија за претпазливост“, истакна Кан.