Кризата - метла за неспособните фирми

Маја Томиќ

Кризата е едно добро чистилиште за некои компании што не успеваат да се приспособат и да ги надминат тешкотиите. Вака размислува претседателот на Стопанската комора на Македонија, Бранко Азески, кој по вчерашната седница на Управниот одбор истакна дека, според бизнисмените, оваа година македонското стопанство добро работело и даночната дисциплина била многу подобрена. Потврда за тоа е што од 1 јануари 2011 година ќе има 30 нови компании, односно даночни обврзници, од кои 90 отсто се од производството.

„Станува збор за група големи даночни обврзници што во услови на значителна економска криза е податок за истакнување“, додаде Азески.

Директорот на Управата за јавни приходи, Горан Трајковски, пак, посочи дека не е зголемен бројот на фирмите со блокирани сметки од страна на УЈП.

„Нема никакви спектакуларни бројки, напротив, бројот на блокадите што ги врши УЈП е драстично опаднат. Можеби во банките е поинаква ситуацијата“, рече Трајковски, додавајќи дека со намалувањето на казните од страна на Управата е направен добар потег, затоа што се постигнале позитивни ефекти и се зголемила даночната дисциплина кај компаниите.

За потсетување, според податоците од Народна банка, само во текот на ноември биле блокирани околу 3.500 жиро-сметки, со што вкупниот број надминал 87.000. Најчести причини за блокади на сметките на фирмите и на граѓаните биле неплатените рати за кредити, неплатени даноци, придонеси, како и долгови кон приватни компании. Експертите оценија дека тоа е резултат на намалената ликвидност на стопанството.

Инаку, на вчерашната седница на УО на Комората, бизнисмените разговарале за две значајни иницијативи што треба да се спроведат наредната година во соработка со УЈП. Tоа е регулирањето на прашањето на пребивањето на даночните обврски со царинските. Втората работа што претстои за в година е да се спроведе модел на наплата на ДДВ што ќе ги елиминира досегашните проблеми при повратот на овој данок.

„И третата важна работа е донесувањето на законот за даночни советници, со кој ќе се досредат состојбите во даночната сфера“, изјави Азески.