Растат лошите кредити, се топат профитите на банките

Нефункционалните кредити зафаќаат 10,6 отсто од вкупното кредитно портфолио, а банкарските профити се стопиле за речиси 30 проценти во споредба со лани, објави вчера Народна банка на Македонија по седницата на Советот.

„И натаму пораст бележи показателот за учеството на нефункционалните кредити во вкупните кредити, и на крај од септември изнесуваа 10,6 отсто, за разлика од 10,1 отсто на крајот од јуни. Стагнирањето на влошувањето кај дел од показателите е карактеристично за изложеноста на кредитниот ризик спрема секторот претпријатија и други клиенти, додека кај секторот физички лица продолжува влошувањето на показателите за квалитетот на кредитното портфолио“, се наведува во соопштението од НБМ. Според него, вкупната добивка што банкарскиот систем ја остварил во првите девет месеци од годинава изнесува 948 милиони денари и е пониска за 29,7 проценти во однос на истиот период лани. Сепак, Советот на НБМ констатирал дека ликвидноста на банкарскиот сектор во земјава е стабилна, а стапката на адекватност на капиталот на банкарскиот систем изнесува 16,4 проценти, односно два пати повеќе од законски пропишаниот минимум од осум проценти. (С.М.)