Црвен картон за буџетот

Црвен картон од опозицијата доби министерот за финансии, Зоран Ставрески, за буџетот за наредната година. Собранието вчера ја почна расправата за предлог-буџетот за 2011 година, за кој опозицијата рече дека не нуди ништо ново, туку е копи-пејст на буџетите од претходните години.

Марјанчо Николов од СДСМ го повика министерот Ставрески да наброи барем еден нов проект, кој ќе биде реализиран в година. „Вашиот буџет, иако сакате да го презентирате како инвестициски, развоен, насочен е само кон расипничко трошење на парите на граѓаните“, порача Николов. Тој смета дека буџетот е антиекономски и антидржавен и е потврда на безидејноста на Владата, а на граѓаните нема да им донесе повисок животен стандард, вработувања и развој. „Живеете на кредит и секое ваше задолжување го прикажувате како успех, а народот умира на рати“, истакна Николов. Реплицирајќи му на пратеникот Николов, Ставрески како нови капитални проекти за наредната година ги посочи реконструкцијата на железничката пруга од Коридорот 10 и изградбата на водоводот во Липково. Со предлог-буџетот за 2011 година расходите се проектирани на 159 милијарди 398 милиони денари, а приходите на 147 милијарди 814 милиони денари. Дефицитот е планиран на 2,5 проценти од БДП, односно 11 милијарди 584 милиони денари. А за наредната година е планирано растот на БДП да достигне 3,5 проценти. (С.М.)