Промовирана монографија за актерката Милица Стојанова

Во Центарот за култура во Крива Паланка завчеравечер беше промовирана монографија за Милица Стојанова, театарска и филмска актерка.

За петте дела, колку што содржи монографијата, мозаикот го составиле нејзината ќерка Искра Гешовска и Јасна Франговска, а се осврна Иван Додовски, универзитетски профес��р и критичар.

„Милица Стојанова е наш сограѓанин, наедно и хроничар на едно време, на случувањата и животот во некогашното маало Стар Амбар и скромната Крива Паланка. Во нејзините записи е запишана и историјата на нашиот град, традициите, збиднувањата, но запишан е и еден невиден успех и пробив во животот и кариерата, темелен на невидената волја и енергија што ги поседува. Таа секогаш ќе има посебно место во кривопаланечката историја и култура за што е прогласена за почесен граѓанин на општината“, истакна градоначалникот на Крива Паланка, Арсенчо Алексовски.

„Барајте ме во театрите, на сцената, под рефлекторите, зад и пред кулисите, во гардеробите, меѓу шминките, периките и костимите. Потсетете се на ликовите, многуте што ви ги претставив за размисла и вреднување што ви ги доверив“, изјави Стојанова на промоцијата.

Фрагменти од биографскиот живот за Стојанова изнесоа актерите Лиле Велјановска и Васил Зафирчев. (К.Р.)