Ватиканската библиотека повторно ќе ги отвори вратите

Ватиканската библиотека, една од најстарите и најбогатите во светот, по тригодишно обновување за која беа потрошени 25 милиони евра, на 20 септември повторно ќе ги отвори своите врати. Обновувањето го финансираше самата Ватиканска библиотека, со помош на спонзори од Италија и од странство.

Во рамките на реконструкцијата, во библиотеката е инсталирана најсовремената безбедносна опрема, која беше неопходна поради пукнатините што се појавија на зградата изградена во 16 век.

Библиотеката во Ватикан на своите полици чува околу 1,5 милион книги, меѓу кои најстарите потекнуваат од првиот век од нашата ера и околу 150.000 ракописи, меѓу кои е и најбогато опремената „Библија“ во светот, украсена со минијатури за чија изработка се потрошени 1,5 килограм злато.

Покрај обновувањето на просториите, меѓу кои и читалницата со тавани украсени со фрески, библиотеката доби и електронски систем за контрола на користењето книги што овозможува во секој момент да се знае каде се наоѓа секоја книга и да се спречи нивно изнесување, бидејќи оваа институција секоја година ја посетуваат околу 4.000 научници, кои тука можат да истражуваат дела поврзани со правото, историјата, филозофијата, историјата на науките и теологијата. (Н.П.)