Руски балетски солисти вечерва во МОБ

Во Скопје почна „Денови на руската духовна култура“

Во рамките на „Денови на руската духовна култура во Македонија“ што почнаа вчера, вечерва на сцената на Македонската опера и балет, гала-концерт ќе одржат балетски солисти од Русија. Почетокот е во 20 часот, а влезот за публиката ќе биде слободен. Влезници нема да бидат потребни ниту за утрешниот концерт на триото „Реликт“, што ќе започне во 19 часот во Музејот на град Скопје.

Манифестацијата, која започна со концерт на Московскиот синодски хор во Соборниот храм „Свети Климент Охридски“, е резултат на соработката на министерствата за култура на Македонија и на Руската Федерација, а дел од неа е и „Неделата на руски филм“, која од утре до 24 септември ќе се одржува во Скопје, Битола и во Охрид.

Ќе бидат прикажани руски филмови тематски поврзани со Втората светска војна, во рамките на актуелното руско одбележување на 65-годишнината од нејзиното завршување.

„Неделата на рускиот филм“ ќе ја отвори филмот „Една војна“, кој ќе биде прикажан во Кинотека на Македонија, каде што проекциите ќе се одржуваат до 22 септември.

Во Центарот за култура во Битола проекциите ќе траат од 18 до 23 септември, а во Охрид, во Центарот за култура „Глигор Прличев“, од 19 до 24 септември.

Руската делегација, која по овој повод ќе пристигне во земјава, ќе ја сочинуваат: Маргарита Терсакова – претставничка на руското Министерство за култура, Сергеј Лазарук – потпретседател на тамошната Унија на филмски творци на Руската Федерација, Михаил Кхумоуров, актер од филмот „Една војна“, Вера Строжоева, режисерката на филмот „Пролетта доаѓа“, режисерот Сергеј Попов и Ирина Корчагина, генерална директорка на Студиото „Фест-филм“.

„Деновите на руската духовна култура“ презентира дел од богатата и повеќеслојна духовна култура на Русија, а освен во Македонија, се организира и во Хрватска, Србија и во Босна и Херцеговина. (К.Б.)