Епидемија на сипаници во Шутка и во Батинци
Во општината Шуто Оризари и во ромската населба во драчевското село Батинци вчера е прогласена епидемија на мали сипаници или морбили. Епидемијата е прогласена со еден ден задоцнување, зашто Републичкиот завод за здравствена заштита и скопскиот Завод за здравствена заштита не можеа да се усогласат во чија надлежност е официјализирањето на епидемијата. Сепак, на крај се установи дека во прашање е локална епидемија и затоа ја прогласи скопскиот Завод за здравствена заштита.
Засега се откриени пет случаи на заразени со мали сипаници, од кои четири се од ромското маало во Батинци, а еден е од Шуто Оризари. Констатирано е дека дел од инфицираните се во роднинска врска и дека не биле вакцинирани. Од заразените случаи четири се сместени на Клиниката за инфективни болести, а едно амбулантски се лекува. Комисијата за заразни болести при Министерството за здравство пред два дена донесе ургентни мерки за спречување на заразата. Вакцинирани се 209 лица, и тоа на возраст од шест месеци до 51 година во ромското маало во село Батинци. (Ј.Ј.) |
