Гасната турбина „ита“ кон Скопје
СТРУМИЦА - Гасната турбина „ита“ кон Скопје. Конвојот специјални возила за транспорт вчера без проблеми го помина патот од Струмица до Радовиш во должина од 25 километри. Неколкуте мали мостови на оваа делница брзо и лесно беа премостувани со шини. Во забрзување на транспортот помогнаа сончевото време и сувиот коловоз.
Специјалните и возилата за логистичка поддршка завчерашната ноќ ја поминаа кај раскрсницата што води до рудникот „Бучим“. За денес е планирано да се продолжи на патот до Штип.
Иако дефектот беше причина што неколку дена возилата заглавија пред Струмица, претставниците на турскиот транспортер тврдат дека не изгубиле многу време. Тие се оптимисти и очекуваат до 10 декември гасната турбина, тешка близу 600 тони, да ја транспортираат до целта - топланата „Скопје-Север“.
Специјалниот транспорт пред една недела тргна од меѓуграничниот простор кај Стар Дојран. Во придружба на тешкиот товар се педесет лица од Турција, Грција и Македонија. (Е.П.) |
