Данките дочекаа да слават над Романија

Петгодишниот пост прекинат на ЕП во ракомет за жени, каде што домаќинот победи со 25:22

Данските ракометарки чекаа пет години на победа над Романија, совладувајќи ја со 25:22 во второто коло од групата А на 9. Европско првенство. Голема заслуга за тоа има исполнетата арена „Гигантиум“ во Олборг, која во текот на целиот натпревар му даваше бучна поддршка на кодомаќинот на шампионатот заедно со Норвешка, кој со овие три бода си обезбеди пласман во втората фаза.

Мечот почна совршено за Данска, чијшто средишен дел од одбраната на чело со Мете Мелгорд и Рике Сков успешно го попречуваше романскиот напад. Заедно со брзите контранапади и со ударите од далечина на Лине Јергенсен и на Лерке Мелер, Данките го контролираа поголемиот дел од првото полувреме. Но, Романките се вратија во игра со брилијантните потези на левиот бек Кристина Неагу, една од номинираните од ИХФ за ракометарка на годината во светот. За само три минути избраничките на Раду Воина израмнија и на одморот заминаа со минимална предност од 15:14.

По паузата блескаа двете голманки Карин Мортенсен и Паула Унгуреану, а продолжи и „танцот“ на Неагу, која ја заврши средбата со девет гола зад своето име. Домашната селекција се обиде да изненади преку крилата, од каде што важни погодоци постигнаа Аугустенсен и Нергорд, која беше најефикасна во победничкиот тим со седум гола. Тоа беше вистинскиот момент да се направи решавачки исчекор и Данките го сторија токму тоа - со серија од осум гола поведоа со 23:17 во 48 минута и до крајот четата на Јан Питлик рутински ја сочува предноста.

По стартниот пораз, вицешампионот Шпанија од ЕП 2008 во Македонија се врати на патот кон вториот круг на првенството, победувајќи ја Србија со 26:23. Идентично постапи и светскиот првак Русија, која ја совлада Хрватска со убедливи 30:24 во рамките на групата Б во Орхус, каде што Црна Гора ја прокнижи и втората победа, славејќи во пресметката на дебитантите против Исланд со 26:23.

Резултати и табели



Група А, второ коло: Србија - Шпанија 23:26, Романија - Данска 22:25. Табела: Данска 4, Романија 2, Шпанија 2, Србија 0. Последно коло, денеска: Романија - Србија (18,45 ч.), Шпанија - Данска (20,45 ч.).

Група Б, второ коло: Исланд - Црна Гора 23:26, Русија - Хрватска 30:24. Табела: Ц. Гора 4, Хрватска 2, Русија 2, Исланд 0. Последно коло, денеска: Русија - Исланд (18,15 ч.), Ц. Гора - Хрватска (20,15 ч.).