Илиевски во Топ-16 на Евролига

Македонската кошарка ќе има свој претставник во фазата Топ-16 од Евролигата во Владо Илиевски, чија Унион Олимпија изгуби во Атина од Панатинаикос со 95:88 и им го препушти првото место во групата Д на Грците, но прв пат по шест години се проби во вториот круг на ова натпреварување. Словенците се втори со пет победи и три пораза, а до крајот им остануваат уште дуелите со ЦСКА Москва и со Валенсија.

Тимот на Јуре Здовц испушти победа над поранешниот европски првак, бидејќи на девет секунди до крајот водеше со 79:75, но Димитрис Дијамантидис го одведе мечот во продолжение со кошот на 0,3 сек. до истекот на основните 60 минути! Унион Олимпија добро го почна и екстра периодот од пет минути, поведувајќи со 82:79, но домашните кошаркари со серија од 11:0 ја однесоа победата.

Илиевски беше втор стрелец во својата екипа со 16 поени (4/5 за тројка), но и прв асистент со шест додавања. За речиси 43 минути на паркетот додаде и по два скока и украдени топки, но и изгуби шест топки.

Успешен во ова коло беше и македонскиот репрезентативец Бо Лестер Мекејлеб, кој со Монтепаски славеше во Загреб над Цибона со уверливи 82:66. Американецот со македонски пасош помина само 18 минути во игра против „фенерџијата“ во групата Ц, забележувајќи пет коша, два скока и едно додавање.

Резултати и табели

Група А: Макаби - Партизан 76:62, Асеко Проком - Жалгирис 69:72, Каха Лаборал - Химки 89:81. Табела: Макаби 7-1, Жалгирис 5-3, Партизан 4-4, Каха Лаборал 3-5, Химки 3-5, Проком 2-6.

Група Б: Шарлроа - Бросе 75:61, Уникаха - Олимпијакос 76:74, Реал Мадрид - Лотоматика 72:50. Табела: Олимпијакос 5-3, Реал 5-3, Уникаха 5-3, Лотоматика 4-4, Шарлроа 3-5, Бросе 2-6.

Група Ц: Цибона - Монтепаски 66:82, Литвос Ритас - Шоле 92:80, Фенербахче - Барселона 69:75. Табела: Монтепаски 7-1, Фенербахче 6-2, Барселона 6-2, Шоле 3-5, Литвос 2-6, Цибона 0-8.

Група Д: ЦСКА Москва - Валенсија 73:63, Армани џинс Милано - Ефес пилсен 84:70, Панатинаикос - Унион Олимпија 95:88. Табела: Панатинаикос 6-2, Олимпија 5-3, Армани џинс 4-4, Ефес 4-4, Валенсија 3-5, ЦСКА 2-6.