Насловна

Ураганот „Ајрин“ во Њујорк

Првпат во историјата вчера запре вкупниот железнички и автобуски сообраќај во градот кој никогаш не спие

Со брзина од 151 км на час, ураганот „Ајрин“ го зафати источниот брег на САД. Никогаш порано толку многу луѓе не биле повикани да ги напуштат своите домови. Вонредна состојба беше прогласена во седум сојузни држави.

Прва на ударот на „Ајрин“ беше сојузната држава Северна Каролина, односно регионот на Џексонвил. Во повеќе од 90.000 домаќинства снема електрична енергија. Гувернерот на Северна Каролина, Беверли Пердју, изјави дека има големи штети на електричната и водоводната мрежа. Иако јачината на „Ајрин“ во текот на изминатата се намали и сега е бура од прва категорија, пр��дупредувањата до граѓаните остануваат во сила. Според Мајк Бренен од Националниот центар за урагани во Мајами, решавачка не е максималната брзина на ветрот, туку многу повеќе големината и траењето на ураганот.

Погодениот регион им припаѓа на најгусто населените подрачја во САД. Во коридорот каде што минува ураганот живеат околу 65 милиони луѓе. Експертите сметаат дека штетите ќе изнесуваат милијарди долари. Повеќе од 2,3 милиони луѓе беа повикани да се засолнат.

Си-Ен-Ен јави дека досега била потврдена смртта на десет лица во подрачјата што се најдоа на патот на ураганот „Ајрин“, кој вчера го погоди мегаполисот. Најмладата жртва на Ајрин е 11-годишно момче, кога дрво паднало на зградата во Њупорт Њуси во Вирџинија.

„Не чекајте и не колебајте се“, апелира американскиот претседател Барак Обама до милиони Американци што живеат меѓу сојузните држави Северна Каролина и Нова Англија.

Градоначалникот на Њујорк Мајкл Блумберг нареди евакуација на над 300.000 жители на јужниот крај на Менхетен и на Кони Ајленд. Евакуирани се и пациентите во две болници за кои се претпоставува дека ќе бидат зафатени од поплави. „Ваква принудна евакуација досега не се случила“, нагласи Блумберг. Граѓаните не треба да се залажат од мирот пред бурата. „Њујоршката градска управа не би наредила евакуација ако не е убедена во потенцијалната опасност на ’Ајрин’“, изјави Блумберг.

Првпат во историјата вчера запре вкупниот железнички и автобуски сообраќај во Њујорк. Откажани се илјадници летови во наредните неколку дена. Вонредна состојба е прогласена во неколку сојузни држави, а подготвени за интервенирање се околу 100.000 члена на Националната гарда. На располагање се ставени и 18 воени хеликоптери за евентуални акции за спасување на североистокот на САД.