Насловна

Глобална војна против дебелите

Потребно е глобална акција против дебелеењето, тврдат британските здравствени експерти

Лондон - Британските здравствени експерти се заложија за потребата од глобална акција, на сите држави во светот, во борбата со дебелеењето на луѓето.

Како една од мерките што би можеле да ја применат сите влади во светот, тие го предлагаат повисокото оданочување на „нездравата“ храна.

Во научен прилог, објавен во угледното британско медицинско списание „Лансет“, експертите инсистираат дека само со заедничка акција, светот ќе може да се справи со проблемот со зголемената тежина на луѓето, што е појава со која се судира најголемиот број држави.

Според британските експерти, с��' уште нема држава која сериозно се зафатила со проблемот на дебелеењето.

Здравствените проблеми, поврзани со дебелината, како што е лекувањето на шеќерна болест, го чинат здравството во државите низ светот и до шест отсто годишно.

Само во Велика Британија, преку 11 милиони луѓе се сметаат дека се дебели.

Во борбата со овој општествен и здравствен проблем, експертите предлагаат покрај оданочувањето и ограничување на рекламирањето на т.н. нездрава храна, но и инсистирањето на драстична промена во начинот на живеење на луѓето, а посебно на децата.

Лекарите предлагаат родителите да им го ограничуваат на своите деца седењето пред телевизори, а на училиштата и на образовните институции измена на храната што им се дели на учениците.

Младите и постарите треба да се вклучат во зголемувањето на физичката активност, што не мора да е поврзана со гимнастички сали и трошењето екстра-пари затоа што може сето тоа да се спроведува во домашни услови, додека државата би можела да се вклучи со издвојувањето помош за семејствата со дебели деца. Здравствените експерти во списанието „Лансет“ сметаат дека хируршките интервенции за намалување на „екстра-тежината“ се една од мерките во борбата против дебелеењето.

Посебно се критикува британската влада, за која се вели дека продолжува само да „дискутира“ околу овој проблем наместо да почне со носењето законски решенија.