Одобрено вработување за тројца лекари

БИТОЛА - За битолската Клиничка болница е одобрено вработување на само тројца лекари. Оваа разочарувачка вест стаса во Битола по најавите од Министерството за здравство дека во Македонија ќе бидат вработени нови 200 лекари. На одлуката реагира Синдикатот на доктори при Клиничката болница, затоа што смета дека тоа е премалку, во однос на реалните потреби.

„Многу сме засегнати од одлуката на Министерството за здравство за три вработувања на лекари. Болницата доби нова опрема, но кој ќе работи со неа кога имаме малку специјалисти? До 2020 година дури 105 специјалисти ќе одат во пензија“, изјави претседателката на синдикатот, Тања Струмениковска-Ристевска.

Од болницата велат дека ќе побараат од Министерството за здравство да се преиспита одлуката. Неодамна, во Клиничката болница почна да пристигнува нова современа дијагностичко-терапевтска опрема од проектот на Владата, во вредност од пет милиони евра.

Од буџетот на битолската болница ќе се гради нов објект со површина од 260 квадратни метри, каде што ќе бидат сместени новата апаратура и коронарното одделение. (А.Б.)