Борис Трајковски бил убиен?

СТРУМИЦА - Седум години по авионската несреќа кај Мостар во која загина Борис Трајковски, неговиот брат-близнак Александар, вчера од Струмица прв пат јавно кажа дека претседателот бил ликвидиран. Сепак, не посочи кој го убил претседателот Трајковски.

„Тоа беше атентат и не е случајност. Претседателот е убиен, физички отстранет. Некому му пречеа неговата работа, искреност, успесите“, изјави вчера Александар Трајковски, брат на претседателот. Тој рече дека немал нови сознанија од истрагата што се води за овој случај. „Лани имав разговор со Андреа Грос и дотаму застанаа работите, повеќе нема“, додаде Трајковски.

Александар Трајковски вчера присуствуваше на испраќањето на планинарите од овој крај на традиционалниот марш од Струмица до Скопје, по повод седумгодишнината од смртта на Борис Трајковски. Тие в сабота треба да пристигнат на гробот на претседателот и да му оддадат почит. (Е.П.)