Украинците свртеа кругче во Скопје

Новите автобуси возат на линиите „3“, „4“, „5“, „7“, „15“, „16“, „19“, „22“ и „24“

Деспина Трајковска


Петнаесетте украински автобуси, конечно, ги запалија моторите, а од вчера сообраќаат по скопските улици на линиите „3“, „4“, „5“, „7“, „15“, „16“, „19“, „22“ и „24“. Честа да направат сефте на долгоочекуваните возила ја имаа премиерот Никола Груевски, придружуван од неколку министри, од градоначалникот Коце Трајановски и други функционери. Автобусот со првите патници заглави во метежот вообичаен за центарот, а за изненадување на премиерот, кој е навикнат на „чисти“ улици и експресно стасување до саканата дестинација.

Почетната станица беше паркингот на спортскиот центар „Борис Трајковски“, а се симнаа на „Илинденска“. Пред да свртат крукче, првите патници ги промовираа возилата. Премиерот потенцира дека новите автобуси се само дел од планираните 302 што ги набавува Владата, за подобрување на јавниот превоз во Скопје.

„Она што пред неколку години беше само желба и сериозна потреба за ЈС�� ‘Скопје‘ станува реалност и почнува да се остварува. Новите автобуси полека, но сигурно ќе ги заменат старите, кои веќе неколку децении се дел од секојдневјето на илјадници граѓани што го користат јавниот градски сообраќај. Главниот град и неговите жители заслужуваат нов и современ јавен превоз, а сега лошата слика со стари автобуси почнува да избледува и Скопје полека добива ново лице“, рече вчера Груевски.

Овие автобуси се првата пратка од планираните 84 нископодни возила, кои Владата за 11 милиони евра ги договори со украински „Лаз“. Останатите 69 се очекуваат до крајот на годинава. Во случај Украинците да го пробијат рокот, ќе плаќаат пенали, како за сегашното доцнење од еден месец.

Автобусите се со препознатливата црвена боја, располагаат со ефикасен систем за греење и за ладење, имаат 28 седишта и 30 места за стоење. Потоа електронски информатор за граѓаните, дигитален тахограф за работа, автоматски менувач, електронска рампа за лица со посебни потреби... Опремени се со мотор што исполнува ЕКО 4 стандард што овозможува намалена емисија на издувни гасови и намалена потрошувачка на гориво.

„Иако се произведени во Украина, 70 отсто од деловите за автобуси се од германско производство“, дополни министерот за транспорт и врски, Миле Јанакиески.

Подновата на возниот парк на ЈСП „Скопје“ по 20 години, не само што ќе значи поудобен и побрз превоз за корисниците туку бенефит ќе има и сообраќајното претпријатие.

Градоначалникот Трајановски истакна дека автобусите ќе придонесат за значителна заштеда на ЈСП за резервни делови, одржување и гориво. Истовремено, тие ќе влијаат и за заштита на животната средина.

Во наредниве три години ЈСП „Скопје“ планира да се поднови со 302 автобуса. Со украински 84 едноподни, 16 минибуси, чија набавка е во тек, и со 202 двокатни автобуса од Кина. Првите 68 даблдекери треба да стасаат годинава.