Полицајци сведочеа против Душко Илиевски

БИТОЛА - Полициски службеници од СВР - Битола вчера сведочеа против Душко Илиевски во процес во кој МВР го тужи фармерот за навреда и омаловажување на премиерот Никола Груевски. Илиевски е обвинет затоа што за време на протестите по пропаѓањето на „Сведмилк“ лепел плакати по бандерите со ликот на премиерот, на кои пишувало „Кражба во 100 чекори“.

Одбраната на фармерот најавува дека по втор пат ќе побара од судот во Битола како сведок да се појави Груевски и да каже зошто се почувствувал омаловажен. Битолскиот суд еднаш го одби ваквото барање. Првично, Илиевски е казнет со 400 евра за ова дело, но по жалбата, Апелациониот суд го врати предметот на повторно разгледување во првостепениот суд.

„Со ова Апелација потврди дека нема дело омаловажување и дека фармерот Душко не е виновен. За жал, овој случај е само еден од многуте во кој се загрозени човековите права преку притисоци од власта врз судството. Вака власта ги шиканира неистомислениците“, рече адвокатот Борис Кондарко.

Покрај овој прекршочен процес, против Илиевски се води и кривичен за наводно одгледување марихуана во нива со компири. Обвинети се Душко, неговиот татко Томе и брат му Цане Илиевски. Судењето беше одложено. „Груевски изгледа се плаши од мене, земјоделецот и пропаднатиот млекар. Затоа постојано вади афери за моето семејство. Полицајците што сведочеа на ништо не се сеќаваат, се' што кажаа беше истресено од ракав“, изјави Душко Илиевски. (А.Б.)