Нетанјаху најверојатно иден премиер
ЕРУСАЛИМ - Лидерот на екстремно десничарската израелска партија Јисраел Беитеину изјави дека го поддржува лидерот на Ликуд, Бенјамин Нетанјаху, да формира нова израелска влада. Авигдор Либерман, прв човек на Јисраел Беитеину, постигна забележителни резултати на изборите што се одржаа на 10 февруари. По ваквиот расплет на настаните голема е веројатноста дека од Нетанјаху ќе биде побарано од страна на претседателот Шимон Перез да формира нова влада. Тој теоретски сега може да смета на поддршката на 65 парламентарци од 120-члениот израелски парламент.
Перез во средата ги почна средбите со партиските лидери, како дел од консултациите од кого да побара да ја формира следната влада. Ципи Ливни од центристичката партија Кадима освои 28 места, наспроти 27 на Нетанјаху од партијата Ликуд. Но, националистичките и религиозните партии, природните сојузници на Ликуд, исто така, постигнаа добри резултати на изборите. Нетанјаху ќе има шест недели да формира коалиција откако од претседателот ќе му биде побарано да формира нова влада. (Би-Би-Си) |
