Прилепските стечајци бараат да се врати условот за стаж
ПРИЛЕП - Околу 700 прилепски работници, технолошки вишок, стечајци и други граѓани поведоа иницијатива за пролонгирање на примената на новиот Закон за пензионирање до 2010 година.
Тие инсистираат основен критериум за пензионирање да биде стажот од 35 години за жена и 40 години за маж, а не како што превидува новиот закон со 62, односно 64 години старост.
Носител на иницијативата е прилепчанецот Гоце Стојаноски, кој и по 37 години работен стаж, сега е технолошки вишок. „ Мојата сопруга работи веќе 35 години. За да го оствари правото на пензија и' се потребни уште 9 години, кога ќе има стаж од 44 години. Јас не знам кој е тој човек, а особено жена што може цел живот да работи“, реагира Стојаноски.
Со новите измени на Законот не се согласува ниту Снежана Котеска, работничка во Тутунскиот комбинат- ДООЕЛ „Цигари“.
„Никој не е виновен што во едно друго време не' вработуваа млади. Вработена сум 21 година, а сега имам 57 години. Но, ја чувствувам веќе староста, имам сериозни здравствени проблеми, и не можам да работам уште 5 години, немам веќе сила да одработам за да дојдам до право на пензија. Од друга страна, младината остана без работа. Луѓе и со повеќе од 40 години немаат една година стаж“, реагира Котеска.
По првата средба во Општинскиот синдикат на ССМ, избран е иницијативен одбор, а веднаш потоа ќе се формира и Здружение кое своите барања писмено ќе ги достави до Собранието, Владата, претседателот на државата и сите други надлежни институции.
„Целта на оваа иницијатива е токму, според моделот на другите држави, да се продолжи периодот на приспособување и примена од старата до новата законска регулатива за пензионирање“, вели Тони
Јовески, претседател на општинската канцеларија на ССМ. (Мн.Т.) |
