Протестите на фармерите добиваат политичка димензија

Кооперантите на „Сведмилк“ само со поддршка од пратениците и советниците на СДСМ

БИТОЛА - Добиваат ли протестите на фармерите политичка димензија? Вчера пред битолската Општина каде што кооперантите на „Сведмилк“ сакаа да го изразат незадоволството од поднесените прекршочни пријави на МВР за минатогодишниот упад во кабинетот на градоначалникот, дојдоа само пратениците и советниците од СДСМ. Фармерите го избрале за правен застапник поранешниот пратеник на СДСМ од Скопје, Борис Кондарко. Меѓутоа, рочиштето закажано за вчера во Основниот суд во Битола, поради неприсуството на сите обвинети фармери се одложи и се презакажа за 26 февруари.

„Никогаш не побаравме да бидеме политички застапени. Сега за овој случај ги повикавме совесните пратеници од сите политички партии за да дојдат, да не' поддржат пред судот и да видат дека народот страда. Ние не сме тука од бес или од луксуз“, нагласи Душко Илиевски, фармер од Битола и водач на протестите.

Иако вчера беше најавено дека на фармерите ќе им се придружат и кооперантите на „Сведмилк“ од други градови, во Битола едвај се собраа триесетина. Илиевски обвини дека ноќта полицијата поминала низ неколку пелагониски и потпелистерски села каде што живеат фармерите и ги убедувала, па дури и ги заплашувала да не одат на протест. Пред општината и судот вчера имаше засилено полициско присуство.

За неовластено присуство во општинската зграда прекршочно се пријавени само 26 сточари од речиси илјада, кои лани на 3 март упаднаа во кабинетот на градоначалникот Владимир Талески. Меѓу обвинетите има и таков што воопшто не присуствувал на настанот.

„Јас не бев на тој протест иако сум кооперант на ‘Сведмилк‘. Кога ја добив поканата за суд, се изненадив. Велат дека имало снимен материјал, а се чудам како е можно тоа кога јас бев дома“, револтирано рече Трајан Георѓиевски, фармер од селото Канино.

Правниот застапник на сточарите, Кондарко, смета дека прекршочните пријави на МВР се неосновани и побара судот да суди непристрасно, без притисоци од власта. „Фармерите само ги бараат парите. Неправедно се обвинети. Се сомневаме дека се дадени пред судија за прекршоци поради притисок на власта. А се сомневаме дека власта е способна да врши и притисоци врз судот. Ако навистина има притисоци за конструирани судски процеси врз овие недолжни граѓани, бараме да се повлечат и да застанат во одбрана на правото и правдата“, повика адвокатот на фармерите, Кондарко. Според него, за делото за кое се товарат, сточарите можат да бидат казнети со 600 до 800 евра. Тие најавија дека ќе платат со затвор.

„Градоначалникот тогаш не' пречека со насмевка и на сите ни порача сендвичи. МВР не' тужи. Ако сега беа избори, немаше да биде така“, рече фармерот од Могила, Гоце Кантаровски.

Сточарите тврдат дека пропаѓањето на „Сведмилк“ ги опустоши пелагониските села. Над 70 проценти од сточниот фонд е продаден или отиде на кланица. (А.Б.)