Буџетот да се скуси најмалку за 150 милиони евра

Кратењето на буџетот, најверојатно, би се движело меѓу 120 и 150 милиони евра, што е од 2,5 до 3 проценти

Александрија Стевковска

Кратењето на буџетот, за што анализите се во тек, најверојатно ќе се движи во рамките од 120 до 150 милиони евра, прогнозираат експертите. Според нив, со оглед на актуелните економски случувања кај нас и пошироко, можеби на крајот на летото ќе треба да се подготви и втор ребаланс на буџетот.

„Мора да се направи реконструкција на расходната страна. Секаде каде што е можно во тековните расходи треба да се скрати, што имаат првенствено непродуктивна основа, а од друга страна капиталните расходни ставки би требало да се продолжат, посебно оние што се почнати. Кај оние што не се почнати, треба да се преиспита нивниот приоритет на реализација и доколку не се приоритет, треба да се одложат и да се финансираат од следните буџети. Мислам дека кратењето би било меѓу 120 и 150 милиони евра, што е од 2,5 до три проценти од вкупниот буџет. Сепак, со оглед на тоа дека состојбите се менуваат на дневна основа, нема да биде никакво изненадување ако се јави потреба за нов ребаланс. Но, за тоа ќе може да зборуваме во август или во септември“, изјави вчера Томе Неновски, професор во Американ колеџ.

Според него, редовна појава е во средина на годината да се прави ребаланс на буџетот, дури и во нормални години, а не во услови кога рецесијата кај нас и околу нас се' уште е присутна и се појавуваат проблеми поради должничката криза во Грција и во останатите земји.

„Тоа неминовно влијае на севкупните економски состојби и движења и кај нас, со рефлексии и на буџетот, што се манифестираат преку намалена приходност во изминативе месеци. Тоа во услови на фиксирани расходни трошоци нема соодветна одржливост. Поради тоа, треба да се ребалансира буџетот во смисла да се преиспита каде потфрлаат приходите и каде може да се очекува дека ќе има следно потфрлување и на тоа ниво, на новата рамка на приходите, се разбира, на надолна линија, да се утврдат и расходите како рамнотежа. Во контекст на тоа, секако, ќе остане буџетскиот дефицит, кој не треба да го надмине проектираниот процент“, вели Неновски.

Од буџетското кастрење нема да биде поштедена ниту една институција, потврди уште еднаш министерот за финансии Зоран Ставрески.

„Сепак, засега се' уште се прават анализи за тоа колку ќе биде вкупниот ребаланс. Во оваа фаза можам да кажам дека ниту еден проект ниту една институција нема да бидат поштедени. Ќе има кратење кај сите институции и речиси кај сите проекти“, вели Ставрески.

Тој се' уште не сака барем ориентационо да даде рамка на кратењето на буџетот. „Работиме со сите институции одделно. Кога ќе завршат сите тие средби, ќе можам да изнесам повеќе детали за ребалансот. Се разбира, пред тоа ќе биде информирана Владата, која ќе треба да го потврди тоа. Тоа не значи дека до крајот на годината сите проекти ќе забават и оти нема да се заврши ниту еден проект. Тоа само значи дека ќе има помалку средства од колку што имало вкупно за сите институции и кај сите проекти“, најави министерот за финансии.

Сегашното ниво на јавен долг на државата достигнува 32 отсто од БДП што, според Владата, експертите и стопанствениците, е ниско и тие го оправдуваат натамошното задолжување. „Планираното ниво на јавен долг достигнува 40 отсто од БДП, што значи дека со сегашните 32 процента, имаме простор за негово зголемување. Тоа би значело на краток рок оправданост за зголемување на јавниот долг, доколку со него се финансираат капитални проекти“, истакна Ставрески. Тој како успешно го оцени неодамнешното роуд-шоу, за барање инвеститори за еврообврзницата, чие издавање за Владата не е ургентно потребно. „Засега состојбите се добри и под контрола“, дообјасни Ставрески.

Професорот Неновски, исто така, го поддржува натамошното задолжување на земјава, но, како што вели, за продуктивни цели и смета оти 32 отсто е реално мала задолженост. „Би требало по примерот на Германија да се лимитира со некој пропис до каде може да оди буџетскиот дефицит на годишно ниво и до каде може да стигне максималниот износ на јавниот долг, а, сепак, да има одржливост во финансирањето“, прецизира Неновски.

„Доколку Владата се задолжува за да и' помогне на економијата, тогаш тоа е оправдано. Но, во игра, освен надворешното задолжување, е и интерното задолжување, на кое Владата треба да обрне внимание и тоа да го стави под контрола. Воедно Владата треба да си ја преземе обврската навреме да си ги сервисира обврските кон фирмите, бидејќи во спротивно ќе биде загрозено нивното функционирање“, истакна Антонио Пешев од „Ултра компјутери“ на вчерашната конференција „Фри маркет роуд-шоу“.