Станарите се спасија од 300 евра глоба

Гордана Дувњак

Граѓаните, кои не успеаја во законскиот рок да ги регистрираат куќните совети, ќе се спасат од глобата од 300 евра, бидејќи Уставен суд вчера ги укина точките 1 и 2 од членот 126 од Законот за домување, донесен во 2009 и дополнет 2010 година. Судиите сметаат дека казнувањето од 300 евра предвидено за нерегистрирање заедница на сопственици, за неизбирање у��равник, како и за недонесување план за тековно одржување на зградите, е неуставно и не претставува прекршок.

Укинувањето е затоа што законодавецот веќе ја уредил оваа материја, при што определил сопственик-поединец да може да поднесе предлог до надлежен основен суд и судот во вонпарнична постапка да ги уреди тие работи. Во услови кога постојат решенија во Законот за непостапување, Уставниот суд утврди дека нема елементи на противправно однесување, односно не постои прекршок, поради што предвидувањето казна за непостоење прекршок не обезбедува владеење на правото. Подносител на оваа иницијатива е познатиот соборувач на закони, пензионерот Стамен Филипов.

Уставните судии вчера се произнесоа и околу двата спорни правилника за дисциплинско казнување и разрешување судии донесени од Судскиот совет. Практично, укината е секоја трета одредба, бидејќи е интервенирано во 11 члена од вкупно 29 на Правилникот за дисциплинска постапка, како и во 9 члена од 27 од Правилникот за разрешување судии. Уставните судии оцениле дека Судскиот совет излегол од своите надлежности и се ставил во функција на законодавна власт. Судскиот совет не смеел да собира докази за судиите, туку само да прибира податоци и да подготвува извештаи. Според Уставен суд, Судскиот совет немал право ниту да определува со какво мнозинство ќе се поведува или запира постапка против судиите.

Укинувањето на овие одредби важи за сите случаи што се во постапка или во иднина треба да бидат разгледувани, бидејќи по објавувањето на интервенцијата на Уставниот суд во „Службен весник“, се укинува основот за разрешување.

Никој не потврдува дали уставната одлука ќе се однесува и за случајот со двајцата скопски апелациони судии, Виолета Дума и Владо Џилвиџиев, бидејќи Судскиот совет веќе ги разреши, а предметот по жалба се наоѓа пред Врховниот суд.

Првиот човек на Врховниот суд, Јово Вангеловски, вчера во телефонски разговор ни изјави дека одлуката на Уставен суд ќе се почитува.

„Жалбената постапка е во тек и таа мора да се заврши во согласност со законските прописи.Општата седница ќе формира Жалбен совет,а седницата ќе се одржи на 21 овој месец.Досега, тој не беше формиран поради доцнењето на апелационите судови, кои треба да изберат свој претставник во Советот“, нагласи Вангеловски. Тој додаде дека не може да се впушта во дополнителни оцени, бидејќи тоа не би било сериозно, бидејќи се' уште не ја видел одлуката на Уставниот суд, а како член на Судскиот совет по функција, не смее да членува во Жалбениот совет. (Г.Д.)