Инвеститорите го повлекуваат капиталот

Нови странски компании нема, а оние што работат
повлекле 300 илјади евра во јули

Соња Маџовска


Не само што не доаѓаат нови странски компании туку и оние што веќе работат во земјава полека го повлекуваат капиталот. Во јули годинава не влегла ниту една нова инвестиција ниту пак, странските компании што работат во земјава решиле да ја реинвестираат ��обивката или да го зголемат капиталот. Тие само си ги зголемиле долговите со нови кредити преку меѓусебни позајмувања со нивните мајки-фирми.

Ова го потврдуваат најновите податоци објавени на нивната веб-страница на Народна банка на Македонија. Според нив, во првите шест месеци од годинава влегле 116, 5 милиони евра, а само во јули има зголемување од 16,2 милиони евра, но не по основа на нови инвестиции, бидејќи таму има одлевање од 300 илјади евра. Просекот го креваат новите задолжувања на странските компании по основа на кредити, во висина од 22 милиона евра само во јули. Од вкупната сума, пак, инвестиции влезени во првото полугодие од годинава, на нов свеж странски капитал отпаѓаат само 73,2 милиона евра, а на кредити 71,1 милион евра. Инвестициите годинава се на уште пониско ниво од лани, која се смета за една од најлошите инвестициски години со реализирани 181 милион евра. Како што тргнало, годинава нема ни оваа бројка да се стигне. Во првите шест месеци од годинава нивото на инвестиции изнесува 116 милиони евра, а во истиот период минатата година влегле речиси 140 милиони евра.

Никој веќе не верува во тоа дека инвестициите кај и да е ќе дојдат, и дека од праќањето промотори по светот има некакво фајде. Кај нас, всушност, наместо странските инвестиции, се множат само промоторите. На постојните 23 треба да им се приклучат уште осум нови. Иако Владата упорно го турка овој проект, според потезите што ги презема во последно време, се гледа дека и таа самата да не верува дека инвеститорите ќе дојдат во наредните две години. Тоа го потврдува фактот што Владата неодамна го продолжи рокот на фирмите кои треба да ја изградат инфраструктурата во индустриските зони, до крајот на 2012 година. Ова значи дека новите зони што се градат нема да бидат подготвени да ги пречекаат евентуалните инвеститори.

И за разлика од Македонија, во регионот странските компании ги реализираат своите планови. Така, на при��ер, неодамна беше објавено дека италијанскиот автомобилски гигант „Фијат“ во фабриката во Крагуевац до 2012 година планира да инвестира речиси една милијарда евра. Српските весници пишуваа дека за нивната земја се заинтересирани и други звучни имиња, како што се „Армани“, „Панасоник“ и „Самсунг“. Во првите пет месеци од годинава нивото на инвестиции во оваа соседна земја изнесува 400 милиони евра, во Хрватска 434, во Црна Гора 164 милиони евра. Во земјава подолго време не се пишува ниту дали ќе се реализираат инвестициите за кои се потпишаа меморандуми, а за нови уште помалку.