Претходен број

Tрибината за црква на плоштадот се претвори во политичка пресметка

Меѓу присутните очигледно имаше активисти на подмладоците на ВМРО-ДПМНЕ и на СДСМ

Деспина Трајковска

Пазарски довикувања, нецивилизирана комуникација, навреди и препукувања, се само дел од впечатоците кои вчера можеа да се добијат на јавната трибина „Парцела Б-5 - популизмот во служба на кичот“, која ја организираше „ПМС - прогресивен млад синдикат“ со цел да се предупреди јавноста, како што беше напоменато, за популистичките и непромислени потези што ги прави Владата преку проектот за изградба на црква на централниот плоштад „Македонија“.

„Плоштадот е јавен простор кој му припаѓа еднакво на секој граѓанин. Тоа не е простор во кој поединци имаат право да ги реализираат своите мегаломански апетити и популистички идеи и тоа со парите од граѓаните“, истакнаа организаторите на отворањето на трибината. Но, наместо да се изведе заклучок и одреден став од неа, трибината се претвори во жестока дебата помеѓу дел од присутните меѓу кои очигледно имаше активисти на подмладоците на владејачката партија и на опозицијата, кои беа дел од публиката.

Организаторите не можеа да ја стават под контрола зовриената атмосфера во која градоначалникот Трифун Костовски најмногу се најде на удар на присутните. Иако во своето излагање категорично посочи дека се противи на изградбата на црквата исклучиво поради тоа што проектот се тера незаконски, Костовски од некои беше обвинуван како минер на проектот од други интереси. Истовремено, на адреса на Костовски, беа упатувани навреди на неговата личност, резултатите од раководењето со Градот, случајот со „Кермес“, неговата пасивност при подигањето на споменикот на Скендер-бег...

„Овој потег е нецивилизиран однос на Владата. Општина Центар е претворена во еден вид месна заедница, исклучиво во функција на Министерството за транспорт и врски, преку кое се тераат неколку владини проекти. Не сум против изградбата на црквата, но законот мора да се почитува. Во случајов, прекршен е Генералниот урбанистички план, кој е устав за урбанистичкото планирање не само на централното подрачје, туку градот, воопшто. ДУП ‘Мал ринг‘ полека но сигурно станува политички ринг за нечија промоција“, дециден беше градоначалникот Костовски, на кого речиси и не му беше дозволено да одговори на нецивилизираните прозивки на дел од учесниците на трибината.

„Апсолутно сум против изградбата на храмот, иако, генерално, треба да се гради. Но, тоа да биде во интерес на економскиот развој, а не на тој начин да се тера популизам во политички интерес. Не само црквата, туку крајно проблематични се и проектите за изградба на музејот, скулптурите и другите објекти, финансирани од Владата“, истакна Никола Гелевски, уредник на списанието „Маргина“.

„Село гори баба се чешла“, прокоментира Гордан Георгиев, извршен директор на ФОРУМ-ЦСИД. „Во државава има толку напластени суштински проблеми, а оваа иницијатива на Владата е непотребна или, пак, намерно поставена како таква за да ги покрие другите проблеми. Ако навистина е така, во таа констелација тоа би бил чист популизам“, дополни Георгиев.

По речиси нецел еден и пол час зовриена атмосфера на трибината, во немоќ да воведат услови за нормална дебата, организаторите ставија крај на дискусијата. Мал дел од независните присутни беа согласни дека воопшто не постоела потреба од организирање на трибината и порачаа Градот целата работа да си ја тера институционално. Токму тој механизам градските власти наскоро ќе го искористат. Имено, како што истакна Костовски, градските власти чекаат одлуката за измена и дополна на ДУП „Мал ринг“, која предвидува изградбата на црквата да излезе во службениот гласник на Општина Центар по што Градот пред Уставниот суд ќе поведе постапка за испитување на уставноста и законитоста при постапката на донесување на одлуката.