Претходен број

Брисел не признава дека згрешил со приемот на Бугарија

На Софија и' се замрзнува целата претпристапна помош од над 500 милиони евра

Од нашиот дописник
Слободанка Јовановска

Брисел - Европската комисија не сакаше да признае вчера дека приемот на Бугарија и на Романија во ЕУ била грешка, иако ја официјализираше одлуката со која на Софија и' се замрзнува целата претпристапна помош од над 500 милиони евра и и' се одземаат акредитациите за двете агенции кои треба во иднина да раководат со многу поголемата помош од над шест милијарди евра до 2013 година. Сакајќи да ја стресе бугарската елита со одлуката, но и да ја ублажи реториката за да не предизвика политичка криза, ЕК ги повлече заканите за блокирање на влезот на Бугарија во шенген и во еврозоната, иако и двете нешта се далечна перспектива за оваа земја. Романија помина без казна, но оцените за оваа земја не беа розови, исто така.

Сепак, првпат Бугарија и Романија се најдоа на различна страна, откако во претходниот извештај во јуни двата извештаја беа направени со копирање на исти делови, дотаму што романскиот осамна со два дела кои се однесуваа, всушност, на другата земја. Иако ЕК првпат покажа подготвеност да ги отслика состојбите во двете земји во вистинска боја, вчера на презентацијата на извештаите, сепак, ретерираше во изјавите во однос на нацрт-извештаите што циркулираа минатата недела, а на прес-конференцијата не се појави никој од функционерите на ЕК, па ни еврокомесарот Оли Рен. „Не се согласувам дека направивме грешка со приемот на овие земји. Ова не е извештај за проширувањето. Кога беше носена одлуката за прием, бевме свесни дека останаа некои нерешени прашања, така што мерките што ги преземаме сега покажуваат дека механизмот што го избравме тогаш функционира“, изјави портпаролот Јоханес Лајтенбергер. Фондовите што се суспендирани за Бугарија, главно, требаше да се инвестираат во инфраструктурата, транспортот, енергетскиот сектор, јакнење на конкурентноста на бугарското стопанство и, како најважно, за подготовка на институциите за користење на многу поголемата помош што земјата ја доби ��ако членка. Без тоа, членството во ЕУ не значи одење напред, ниту може да обезбеди хармонизирање на земјата на пократок рок, до нивото на другите земји-членки на Унијата.

Реакциите што од Софија стигнаа вчера до Брисел беа дека ЕК и' го урнала угледот на владата со извештаите, иако бројките покажуваат дека Бугарија не ни имала којзнае каков капацитет дури и да го злоупотреби тоа што го добивала од ЕУ, бидејќи искористила само дел од претпристапната помош. „Бугарија не е во можност да ги користи целосно бенефициите од помошта поради критичката слабост на администрацијата и на судството, и на локално и на централно ниво. Бугарската администрација страда од големи смени и неатрактивни плати кои создаваат услови за корупција. Законите не треба само да се носат, туку и да бидат имплементирани, а институциите да бидат поефективни и да даваат повеќе резултати“, стои во извештајот во кој се потенцира дека корупцијата на високо ниво и организираниот криминал додаваат на сликата на генерална слабост. Една од препораките, притоа, на ЕК до Софија е да ја зачува доверливоста на кореспонденцијата со Брисел, односно да не објавува доверливи документи како што се случи со овие три извештаи.