Претходен број

Хелсиншки: Континуирано се урива принципот на пресумпција на невиност

За Министерството за внатрешни работи Хелсиншкиот комитет бил „малку збунет“ и „имал лош ден“

Во најголем број случаи не се почитува начелото на пресумпција на невиност кое е едно од основните постулати на кривичната постапка заштитено со Уставот на Република Македонија и Европската конвенција за човекови права, се вели во вчерашната реакција на Хелсиншкиот комитет по повод последните спектакуларни апсења.

Од оваа невладина организација подвлекуваат дека во некои случаи постои сомнителна примена на процедурите пропишани со интерните акти на МВР. Иако, во Уставот се гарантира принципот на пресумпција на невиност и правото на приватност, достоинство и углед на личноста, сепак, она што секојдневно се гледа во Македонија е како уапсените ги снимаат, спроведуваат до истражен затвор или истражен судија, а настанот е топ-тема во сите медиуми.

„Со оглед на фактот дека МВР е организатор и реализатор на полициските акции на приведување, сосема е симптоматично како истите медиумите се точно известени за денот, часот и местото на приведување, па се во можност спектаклот на уривање на нечие достоинство да го прикажат на целокупната македонска јавност“, се вели во реакцијата на Хелсиншки комитет.

Според нив, со прикажувањето на оперативните снимки се повредува и правото на приватноста, личниот и семеен живот, угледот и достоинството кои, исто така, се гарантирани со Уставот и меѓународните акти. „Ова право не може да се ужива кога на телевизиите се вртат снимки од приведени лица и притоа се кажуваат нивните имиња, или пак како во некои случаи кога, за да биде иронијата поголема, МВР информира со иницијали проследени со слика и поблиска определба на професијата на лицето“, нагласуваат од Хелсиншки.

Поради сето ова, Хелсиншкиот комитет инсистира на примена на членот 8 од Европската конвенција за човекови права, што подразбира дека при обезбедувањето информации за осомничени, обвинети или осудени страни во кривичните постапки треба да се почитува нивното право за заштита на прив��тноста.

За нив е интригантно и прашањето дали во ваквите акции полицијата може да ги оправда средствата за врзување лица (лисици), со спречување на отпор спрема полициски службеник, бегство или самоповредување на лицето, или пак лисиците на приведените лица се само еден сегмент на „циркуската“ претстава што Министерството ја пласира со помош на медиумите!

Хелсиншкиот комитет потсетува и на Кодексот на новинарите и на нивната улога во градењето на демократијата и цивилното општество и слобода. Тие сметаат дека во ниту еден случај немаат намера да го минимизираат правото на јавно информирање, но ги повикуваат новинарите да бидат внимателни и притоа да не ги повредуваат другите базични права.Од оваа невладина организација ја охрабруваат и оценуваат како позитивна борбата на државата против корупцијата и спречувањето на криминогените дејства, но укажува дека таквите акции не смеат да ги повредуваат основните принципи и заложби за почитување на основните човекови права и слободи.

За Министерството за внатрешни работи Хелсиншкиот комитет бил „малку збунет“ и „имал лош ден“. Во вчерашната реакција, меѓу другото, се вели: „МВР искрено верува дека не станува збор за некакви политички интереси и дека Хелсиншкиот комитет нема да инсистира МВР да ја прекине комуникацијата со јавноста и медиумите. Се надеваме дека Хелсиншкиот комитет знае дека одамна помина времето на комунизмот и едноумието, кога службите можеа да приведат одредено лице и за тоа не смееше ниту да се праша. МВР нема да дозволи да биде обвинето дека ’киднапира‘ лица без никакво сомнение или постапка, без разлика што Хелсиншкиот комитет цени дека не требало ниту да се дадат информации за ’поблиската определба на професијата на лицето‘“, стои во соопштението од МВР.

МВР, се додава во соопштението, нема да си дозволи да го узурпира правото на слободно информирање на медиумите, ниту, пак, ќе лаже при одговарањето на нивните прашања. Од МВР потсетуваат дека судот е тој кој во независна постапка (без протести и политички притисоци) одлучува за нечија вина. „Се надеваме дека Хелсиншкиот комитет нема да си дозволи да почне со вршење притисоци врз Врховниот суд, со чија дозвола медиумите присуствуваат во судниците, иако станува збор за лица против кои е поведено обвинение, што значи лица чија вина се' уште не е утврдена со правосилна пресуда“, се наведува во денешното соопштение од МВР.