Ахмадинеџад: Напад на Иран ќе значи крај за Израел

ДОХА - Секој напад врз Иран би довел до уништување на државата Израел како политички ентитет, изјави иранскиот претседател Махмуд Ахмадинеџад во неделата за време на посетата на заливската арапска држава Катар. „Секоја мерка против Иран би била еднаква на елиминација на ционистичкиот режим од политичката географија (на регионот)“, изјави тој на конференцијата за печат, осврнувајќи се на можен напад од Израел или од САД. Неговите коментари на јазикот фарси беа пренесувани од иранската новинска агенција ИРНА.

Ахмадинеџад, кој е во Катар на разговори со катарскиот емир Шеик Хамад Бин Калифа ал Тани, честопати повик��ваше на уништување на еврејската држава.

Иран не го признава Израел. кој го нарекува ционистички режим. Израел, за кој се верува дека е единствената земја на Блискиот Исток што поседува нуклеарно оружје, ја смета нуклеарната програма на Иран како закана за сопственото постоење и не ја исклучи можноста за воена акција за да го спречи Иран од производство на атомска бомба. Воведени се меѓународни санкции врз Иран за да се принуди Техеран да ја запре чувствителната нуклеарна работа. Иран соопшти дека неговата нуклеарна програма е за мирновременски цели, примарно за производство на електрична енергија. (Ројтерс)