Во вселената експресно се старее

Во Земјината орбита за шест месеци човековото тело остарува и до 40 години

Едно неодамнешно истражување, кое покажа дека во Земјината орбита за само шест месеци човековото тело може да остари речиси 40 години, ги шокираше експертите на американската Национална вселенска агенција (НАСА) и ги искомплицира плановите за организирање мисија на Марс.

Пример за ова е јапонскиот астронаут Соичи Ногучи, кој кога замина на престој во Меѓународната вселенска станица (МВС) имаше 45 години, а кога се врати на Земјата некои органи во неговото тело имаа карактеристики на човек што е на возраст од 80 години.

По шестмесечниот престој во вселената неговата мускулна маса била слична како на онаа кај просечен 80-годишен старец, наспроти доброто здравје и колку-толку коректната исхрана во МВС.

Неговото тело за тие шест месеци остарел 35 години, но по враќањето на Земјата, Ногучи повторно се подмладил благодарение на вежбите што ги изведувал еден месец.

До овие резултати дошол тим научници од универзитетот „Маркет“ во Милвоки, кои прв пат го испитувале овој феномен.

Истражувањето го потврди она што веќе и претходно се знаеше дека астронаутите по враќањето често треба да бидат придржувани и треба да им се помага за да излезат од модулот со кој се вратиле на Земјата.

Научниците наведуваат дека не станува збор само за истоштеност на долните екстремитети, туку се воочени и кардиоваскуларни проблеми, бидејќи чо��ековиот организам се труди да се приспособи на вселенските услови и на тој начин забрзано старее.

Истражувањето покажало дека астронаутите губат повеќе од 40 проценти од мускулното ткиво навикнато на контракција. Последица од ова се губењето на рамнотежата и тешкотиите телото да се одржи исправено.

Цел на оваа студија, финансирана од НАСА, е да се утврдат реакциите на човековото тело за време на долготрајна мисија во вселената, што би било случај, на пример, при патување на Марс.

За да се врати првобитната кондиција се потребни физички вежби, но како да се вежба ако по пристигнувањето на оддалечена планета се утврди дека е потребно да се излезе во вселената и да се поправи некој дефект? „Остарените“ астронаути не би биле во состојба да го сторат тоа, па затоа НАСА сега се обидува да најде решение за овој проблем.