Газдите продаваат дел од имотот, „Оне“ демантира

Дали телекомуникациската компанија „Оне“ ќе остане без дел од своите продажни објекти во Македонија? Оваа недоумица и дилема во јавноста ја отвори словенечкиот весник „Финанце“, кој објави дека таа можност е наметната како еден од начините директорот на „Телеком Словенија“, Ивица Крањчевиќ, на крајот од годината да се пофали со подобри резултати од работењето во земјава.

Од „Оне“ овие информации ги квалификуваат како чисти шпекулации. „Направена е консолидација и оптимализација во продажната мрежа на компанијата, со цел да бидеме подостапни до корисниците“, велат од оваа компанија.

Според весникот „Финанце“, Крањчевиќ ќе продаде дел од продавниците на ГСМ-продажната мрежа на „Оне то оне“. Од „Телеком Словенија“ не ја негирале продажбата на продавниците на „Оне“ во Македонија.

„Супервизори на ’Телеком Словенија‘ имаат намера повеќе внимание да му посветат на работењето во Македонија, каде што од месец во месец се кумулираат загуби. Ако не се случи нешто добро, очигледно може да се случи во националниот телекомуникациски оператор оваа зима да бараат нов шеф“, се наведува во анализата на словенечкиот економски весник.

„’Телеком‘ ќе ја затвори ’Оне то оне‘, компанија за продажни услуги на операторот ’Оне‘, и со тоа ’ќе го оптимизира своето работење‘“, пренесува весникот.

„Клучните продажни места, ’Оне то Оне‘ имаат 66 продавници, кои ќе бидат вклучени во македонската матична компанија ’Оне‘, со цел да ги зајакнат франшизните продажни канали. Се молчи за тоа колку средства се очекува да се добијат од продажбата на дел од продавниците. Инаку, бројот на корисници на ’Оне‘ во Македонија годинава, споредено со истиот период лани, се намалил од 423.553, на 412.072“, објавува „Финанце“.

И покрај тоа што бројот на претплатници расте, во компанијата признале дека учеството на припејд-корисниците се намалувал. „Телеком Словенија“ во Македонија во првата половина од годинава имал вкупно 542.436 корисници на различни услуги, што е за 4,2 отсто повеќе од истиот период лани, а мобилни претплатници има за 5 отсто повеќе. „По преземањето, ’Оне‘ им е препуштен на некои локални експерти за информатичка технологија. Сега таму ’Телеком‘ очигледно има проблеми во системот за пресметување на повиците“, информира весникот. Во него се додава дека од „Телеком Словенија“ истакнале дека бројот на вработени во трите македонски компании („Оне“, „Оне то Оне“ и „Он.нет“) е намален за 70 луѓе, на 127 вработени, но во светлина на оптимизација на работењето. „Информатичкиот систем, кој беше употребуван од ’Космофон‘, не ги исполнува нашите стандарди и затоа доцни процесот на обновување, кој се очекува да заврши до крајот на годинава“, било објаснувањето од компанијата.

„Телеком Словенија“, наводно, имал проблеми со здружувањето на компаниите во Македонија.

Инаку, Ивица Крањчевиќ, пред преземањето на функцијата во „Телеком Словенија“, беше партнер на компанијата „Вафер“, преку која вршел технички преглед на македонската компанија „Оне“. (А.С.)