Избрани дела од Раде Силјан во шест тома

Во издание на „Матица македонска“ од Скопје деновиве излегоа од печат Избрани дела во шест тома од истакнатиот македонски поет, литературен критичар и есеист, Раде Силјан, годинашен добитник на највисоката државна награда за животно дело „11Октомври“.

Во повеќетомното издание е направен селективен избор од поезијата што ја создавал авторот децении, како и критичко-есеистички текстови за македонските драмски писатели, раскажувачи, поети, романсиери и критичари.

На крајот од секој том се приложени извадоци од критиката на врвни интелектуалци, академици, професори, доктори на науки, писатели, литературни критичари. Застапени се текстови од Гане Тодоровски, Матеја Матевски, Луан Старова, Витомир Митевски, Христо Георгиевски. Петар Т. Бошковски, Данило Коцевски, Димитру М. Јон, Веле Смилевски, Тодор Чаловски, Санде Стојчевски, Миодраг Друговац, Благоја Иванов, Паскал Гилевски, Јован Павловски, Владимир Костов, Светлана Христова Јоциќ, Стефан Влахов Мицов, Радомир Ивановиќ, Мирољуб Стојановиќ, Бранко Цветковски и други.

Раде Силјан е добитник на значајни домашни и меѓународни награди за литература, а негови поетски книги се преведени на англиски, германски, француски, шпански, грчки, турски, романски, српски, хрватски, словенечки, украински, албански и на латински јазик.

Дизајнот на книгите е дело на познатиот ликовен уметник Кочо Фидановски. (Н.П.)