Енергична завршница на „Скопје џез-фестивал“

Манифестацијата финишираше со Тригве Сеим и Фроде Халтли, Терје Рипдал и „Берген биг банд“ и „Аронас“

Бојан Шашевски

По настапите на кубанскиот композитор и пијанист Омар Соса, Италијанката Марија Пија де Вито, гитарскиот магионичар Лери Карлтон, младиот Холанда, ансамблот „Флат еартх социетѕ“, квартетот на импресивната Барбер, но и полноќните клупски свирки со саксофонистот Јури Онинг, боса-новата на Пола Мореленбаум и американскиот колектив „The Ethnich“, дојде време да се збогуваме со 29. издание на „Скопје џез-фестивал“ и да ги пречекаме последните концертни возбудувања.

Овој пат гостите на манифестацијата се преселија од Универзална сала во Македонската опера и балет, каде што Оливер Белопета го најави крајот на овогодишниот фестивал, им се заблагодари на музичарите и на верните посетители, напомнувајќи дека подготвуваат специјална програма за следното јубилејно, 30. џез- соединување.

За соодветен музички финиш се погрижија две интересни норвешки групации. Краткиот, но слаткиот настап на тандемот Тривге Сеим и Фроде Халтли претставуваше интимна, интриганта, на моменти мрачна и помалку елегична спојка на дуото со публиката. Едночасовното дружење со Скандинавците ја докажа нивната флексибилност, каде што хармониката на Халтли дишеше и воздивнуваше, а саксофонот на Сеим му зборуваше на будниот аудиториум. Колаборацијата одлично го претстави музичкото парче „Ѕераз“ – модерна џез-композиција.

На традиционалната норвешка вечер воопшто немаше време за пауза. Терје Рипдал со себе го донесе дваесетчлениот „Берген биг банд“ и гласен, мултиинструментален звучен бран. Колективот на реномираниот гитарист дејствуваше како еден комплексен жив организам, истовремено правејќи апсурдна, драматична, возбудлива и оркестрална атмосфера. Интересни беа и вметнувањата на семплови од американски гангстерски филмови, соодветна подлога за неодамнешниот проект-албум наречен „Crime scene“.

Се чини дека фестивалот не можеше да заврши подобро. Динамични и експлозивни, духовити и оригинални, џез-панк составот „Аронас“ ги остави без здив посетителите во клубот „Хардрок“. Ексцентричниот Арон Отињон играше, скокаше, лежеше на земја, свиреше на пијано, се симна меѓу присутните, а по бисот на сцената да земе и неколку девојки од публиката. Несомнено, енергијата што ја поседуваат четворицата момци од новозеландско-англискиот состав и' додадоа уште еден убав впечаток на манифестацијата „Скопје џез-фестивал“.