Хашим Тачи ја отвори Пандорината кутија

Скандалот е осуда на ОВК и на западната политика

Лондон -  Британскиот публицист Ник Кларк, во текст во „Гардијан“, кој ги изнесува своите лични гледања, тврди дека извештајот на Советот на Европа за вмешаноста на луѓето од поранешна ОВК во шверцот на човечки органи, земани од заробениците што претходно биле убивани, не само што е осуда за ОВК, туку претставува осуда и за целата политика на Западот спрема Косово и тамошните случувања.

Кларк ги осудува ставовите на американскиот сенатор, Џозеф Либерман, од пред 11 години за тоа дека САД и ОВК се залагаат за истите хумани вредности и принципи, имајќи ги предвид наодите на истрагата што ја направи Марти, а потсетува на изјавата на Роберт Гелбард, советник на поранешниот американски претседател Бил Клинтон, за тоа дека ОВК „несомнено е терористичка група“. Тој спомнува дека „Тајмс“ во 2000 година објавил оти американските разузнавачи ги обучувале припадниците на ОВК, а воедно и изјавата на поранешниот командант на ОВК, Шабан Шаља, дека американските и британските разузнавачи контактирале во Албанија со косовската ослободителна армија.

Како противник на политиката за либерален интервенционизам, врз чија основа 78 дена беа бомбардирани териториите на тогашна СР Југославија и Косово, во својот напис во лондонскиот весник остро ги критикува „хуманитарното бомбардирање“ и „добрата војна“ што беше водена во тој дел од Балканот, инсистирајќи дека бомбардирањето на Косово и политиката што кон него е водено е грешка, како што се погрешни и војната и политиката кон Ирак.

Станува збор за неморално бомбардирање, како што беше и ирачкото, забележува Ник Кларк, осудувајќи ја политиката на поранешниот британски премиер Тони Блер и неговата оцена дека Косово е „успех на меѓународната заедница“ и инсистирајќи на тоа дека ирачката воена интервенција е целосно дискредитирана.

Ова е прв пат во „Гардијан“ да се изедначат косовската и ирачката интервенција, затоа што позицијата на овој пролабуристички лондонски весник е за оправдување на војната во Косово и за остра осуда на војната во Ирак, иако и двете се водени без резолуција на Советот за безбедност на ОН.

Според лондонски „Економист“ блокиран е патот во ЕУ за секоја идна косовска влада. Обвинувањата за изборен грабеж на последните парламентарни избори, илегалната трговија со човечки органи и шверцот со дрога, ќе го блокираат обидот на која било влада на Косово да го трасира патот на новата балканска држава кон ЕУ, пишува британски „Економист“.

Неделникот забележува дека тежината на откритијата на Дик Марти во извештајот на Советот на Европа за косовските случувања од пред над една деценија, како и актуелната косовска реалност, секако, ќе се испречат пред властите во Приштина и пред нивните европски амбиции, без разлика дали победникот на изборите од минатата недела, Хашим Тачи, ќе успее да формира коалициска влада со една партија или неколку помали партии, па дури меѓу нив да се најдат и партиите на малцинствата.

Малку може да помогне тоа што косовската влада се брани оценувајќи ги наодите на известувачот Дик Марти како „клеветнички“ и потсетувајќи дека и порано имало вакви обвинувања, но сите истраги што беа спроведени не успеаја да најдат докази. Ситуацијата за Хашим Тачи, според „Економист“, се усложнува и затоа што за многу набљудувачи неговата изборна победа е сомнителна, бидејќи гласањето за новиот состав на косовскиот Парламент поминало со бројни неправилности.

Москва ги смета изборите на Косово за „нелегитимни“, изјави портпаролот на руското Министерство за надворешни работи, Алексеј Сазанов.

„Не ги сметаме за легитимни одржаните парламентарни избори во Косово на 12 декември, бидејќи тие беа организирани од властите на самопрогласе��ата република. Предизвикува паника и таканаречениот успех на екстремно радикалните косовско-албански партии“, истакна Сазанов, додавајќи дека набљудувачите на изборите регистрирале голем број сериозни нерегуларности.