Што знаел Западот за Тачи?

Генерал Весли Кларк, Агим Чеку, генерал Џексон (од Велика Британија), Бернард Кушнер (УНМИК) и Хашим Тачи (оддесно налево)

Извештајот на швајцарскиот парламентарец Дик Марти за вмешаноста на актуелниот косовски премиер Хашим Тачи во мафијашки структури во земјата и трговијата со дрога и човечки органи предизвика големо внимание во германскиот печат. За весникот „Зидојче цајтунг“, индикативно е што и покрај сериозните обвинувања на сметка на Тачи, досега не можеа да се обезбедат докази.

„Ниту на Дик Марти не му успеа да обезбеди докази. Станува збор, пред се', за индиции, изјави и цитати од извештаи на тајните служби што ги систематизирал швајцарскиот политичар. Марти се жали дека сведоците на Косово молчат. Во извештајот за Хашим Тачи говори како за шеф на мафијата, која и денес е многу влијателна. Групата ја сочинуваат поранешни лидери на ОВК. Тие се недопирливи, бидејќи ја имаа поддршката на САД и на европските земји во борбата за независност. Марти особено ги критикува меѓународните претставници, кои се наоѓаат на Косово од 1999 година и кои беа заинтересирани единствено за краткорочна стабилизација, жртвувајќи ги притоа правните принципи“, заклучува „Зидојче цајтунг“.

Весникот „Хамбургер абендблат“ ја анализира натаму улогата на меѓународната заедница.

„Доколку критиките на Советот на Европа се точни, тоа значи дека Косово до врвот е опфатено со мафијата, која многу повеќе заглавила во криминалот и корупцијата отколку што е тоа случај во другите земји од регионот, каде што и инаку тоа е вообичаено. Европа не може да прифати докажан криминалец, можеби дури и убиец, да стои на чело на државата. Меѓутоа, скандалот со уште попогубни последици се крие меѓу редовите на извештајот на Советот на Европа. Доколку е точно дека САД, ЕУ и ОН од тактички причини, ги затворале очите пред трговијата со органи, тоа би претставувало невиден морален пораз за Западот“, наведува „Хамбургер абендблат“.

„Нојес Дојчланд“ забележува дека обвинувањата на сметка на Тачи не се ништо ново, но дека тој досега уживал поддршка од западните држави.

„Полека разбираме дека нашиот ’западен модел на правна држава’ не може да се извезува ни во Ирак или Авганистан ниту, пак, на европскиот југ. Иако во Косово веќе 11 години престојуваат десетици правни експерти, партиите што учествуваа на парламентарните избори се жалеа на изборни нерегуларности и манипулации. Секако дека ваквите приговори можат да се објаснат и со неуспехот на таа партија која се жали, но факт е дека корупцијата и организираниот криминал го оневозможуваат развојот на протекторатот на ЕУ и на НАТО. (Дојче веле)