„Викиликс“ не прекршил австралиски закон

Асанж не направил кривично дело во Австралија со објавувањето американски документи

Ниту веб-сајтот „Викиликс“ ниту неговиот австралиски основач Џулијан Асанж не направиле некакво кривично дело во Австралија со објавувањето на официјални американски документи, соопшти полицијата. Според „Сандеј морнинг хералд“, полицијата соопштила: „Австралиската федерална полиција ја комплетираше својата процена на достапниот материјал и не утврди постоење на какво било кривично дело под јурисдикција на Австралија. Доколку се објавени дополнителни документи и постои сомневање за кривично дело, тогаш тие материјали треба да се достават до австралиската федерална полиција за процена“, се наведува во соопштението на полицијата.

Властите побараа од полицијата да каже дали Асанж направил некакво кривично дело со објавувањето на илјадници доверливи документи на американските власти преку веб-сајтот „Викиликс“. Ова се случи и покрај тоа што премиерката Џулија Џилард пред две недели ги окарактеризира акциите на веб-сајтот како „незаконски“, соопшти весникот. Џилард подоцна пред новинарите изјави дека објавувањето на американските телеграми од страна на „Викиликс“ бил груб и неодговорен акт.

Но, таа додаде дека Асанж ќе има пристап до комплетна конзуларна помош. „Очигледно, како австралиски државјанин, Асанж има право на конзуларна помош што им ја обезбедуваме на австралиските државјани низ светот кога се соочуваат со законот“, изјави Џилард.

Таа додаде дека владата верувала оти е соодветно да се предаде предметот на федералната полиција за да се утврди дали имало некакво кршење на австралискиот закон. Џилард рече дека основата на протекувањето е незаконски акт, првичното преземање на документите е прекршување на американскиот закон. Тоа не е направено од новинар, туку од лице со пристап до доверлив материјал, додава таа. (Аустралијан њус)