„Блиц“: Парите од органи оделе во западни банки

Во Косово, меѓу 1996 и 1999 година пристигнале 900 милиони германски марки

Белград - Сметки на банки во Швајцарија, Албанија, Германија и во уште неколку европски земји, за кои се смета дека се користени за внесување пари од продажбата на човечки органи на Косово можат да се искористат како докази што ќе доведат до косовскиот премиер Хашим Тачи, кој е наведен како лидер на криминална група во извештајот на Дик Марти, пишува белградскиот весник „Блиц“. 

Според податоците на известувачот Марти, Тачи го зел поголемиот дел од парите што биле собрани за ОВК, а, според германската разузнавачка БИА, во Косово и Метохија меѓу 1996 и 1999 година пристигнале 900 милиони германски марки. Според процените на американската ДЕА, дури 90 отсто од хероинот што влегува во Европа, минува низ Косово.

Следењето на овие сметки го почнала екипа на српското Обвинителство за воени злосторства и американското ФБИ што врши истрага на финансирањето на екстремистички исламистички групи по терористичките напади на 11 септември 2001 година. Според нивните податоци, овие сметки биле откриени на лични имиња, но најчесто на фалсификувани хуманитарни организации што се користеле како прикривање на криминалната дејност. Некои од овие организации се „Помош за Косово“, „Медикер“, „Ал Харамајн“, „Талиба интернационал“.