Кој е идниот зет на Бил Клинтон?

Челзи Клинтон и Марк Мезвински најавија свадба за наредното лето

Челзи Клинтон, ќерката на поранешниот американски претседател Бил Клинтон, минатата недела се сврши со своето долгогодишно момче, Марк Мезвински. Челзи и Марк се запознале уште како тинејџери, а во врска се долги години. Портпаролот на Клинтонови ја потврди веста за свршувачката, објавувајќи дека двојката се верила за време на Денот на благодарноста. Среќната двојка им ја соопшти радосната вест на своите пријатели преку електронска пошта, најавувајќи дека свадбата ќе се одржи наредното лето.

Идниот зет на Бил Клинтон е банкар за инвестиции по професија, а неговите родители, кои беа членови на Конгресот, се долгогодишни пријатели со Бил и Хилари Клинтон.

Марк доаѓа од семејство со силни политички врски, но Мезвински, сепак, не се толку моќни како Клинтонови. Всушност, тие се и контроверзно семејство. Имено, таткото на Марк, Ед Мезвински во 2002 година бил осуден поради финансиски измами, за што отслужил шестгодишна затворска казна.