„Без наслов“ на Јозеф Наѓ во црно-бел ракопис

Скоро цела година театарскиот уметник Јозеф Наѓ, работи на најновата претстава „Без наслов“ која ќе се случи вечерва на сцената на Центарот за култура „Григор Прличев“ во 21 часот. Во простор од 4 на 5 метри и со времетраење од 80 минути, се случува кореографско, естетско и филозофско истражување на интимноста во просторот. Во црно бел ракопис само под светлоста на свеќата, авторот создаде мрежа на сценски движења на двајцата уметници во коцка-простор.

„Без наслов“ е единствениот проект каде Јозеф Наѓ е комплетен автор. Меѓутоа како што тој кажува „поради ограничување на просторот во коцка, самата минималност ни даде подобра можност од било кое друго место да се по��ажеме во најдобро светло“. Главните актери играат во провидна, затворена коцка каде се сосема збиени во тесен простор што е многу важно во меѓусебните односи, но во релација која ја имаат кон публиката, во смисла на воспоставување на многу посебна интимност додека публиката ја гледа целата точка низ стакло.