Во Македонија нема свинско месо од Ирска
На пазарот во Македонија нема опасност да се најде свинско месо увезено од Ирска, контаминирано со диоксин. Првиот човек на Ветеринарната управа, Дејан Рунтевски, потврди дека земјава не увезува свинско од Ирска, што значи дека потрошувачите не се доведени во опасност да консумираат контаминирано месо. Претставници на здравствените служби во Европа деновиве ги повикаа своите потрошувачи да не јадат ирско свинско месо откако во ирските преработки од свинско и во храната за свињите е пронајден диоксин, потенцијално канцерогена супстанција, во 80-200 пати поголеми количества од дозволените.
Откако властите во Даблин објавија дека ирските производи од свинско месо се со диоксин, на продавниците низ Европа им е наложено да ги повлечат од продажба ирската сланина, шунка и колбаси.
Повлекувањето на сите преработки од свинско месо, произведени по 1 септември, ирската влада го нарече мерка на претпазливост.
Главниот инспектор на ирската ветеринарна служба соопшти дека контаминираното свинско месо било извезено во 20-25 држави.
Ирска е голем извозник на свинско, а Велика Британија е нејзин најголем пазар, следуваат Германија, Франција, Русија и Јапонија.
Агенциите веќе јавија за повлекување 60 тони ирски производи од свинско месо од Бугарија, а контаминираното месо најверојатно било извезено и во Хонгконг, Кина и во Холандија. (А.С.) |
