Дефицитот достигна речиси 2,5 милијарди долари
Стоковната размена на Македонија за десетте месеци од годинава е повисока за 36,7 проценти во однос на истиот период минатата година, соопшти Државниот завод за статистика. Според претходни податоци, вкупната вредност на извозот во периодот јануари-октомври годинава изнесува 3.446. 897 илјади долари, а на увозот 5.930.522 илјади долари. Покриеноста на увозот со извоз е 58,1 процент, односно трговскиот дефицит изнесува 2.483.626 илјади долари или приближно 2,5 милијарди долари.
Трговската размена по производи покажува дека во извозот најголемо е учеството на фероникелот, нафтените масла и маслата добиени од битуменозни минерали, производите од железо и челик (валани производи) и облеката. Во увозот најмногу е застапена суровата нафта, електричната енергија и моторните возила за превоз на лица. (МИА) |
