Конфекционерите бараат намалување на придонесите за вработување
ПРИЛЕП - Конфекционерите од Прилеп побараа од Владата конкретни мерки за ублажување на негативните ефекти од глобалната финансиска криза. Пакетот мерки донесени неодамна не се однесува на текстилната индустрија која не може да си дозволи давачки кога не работи.
„Намалена е работата за 20 до 50 проценти. Ние ќе предложиме укинување на давачките спрема државата за даноци и придонеси во време кога не се работи за да не ги отпуштаме вработените“, изјави претседателот на Групацијата за текстил при Регионалната стопанска комора, Благоја Конески.
„Во мојата фирма обемот на работа е намален за 10 проценти, но поголем проблем е што не може да се планира производството. Треба да се избориме со транспортните претпријатија за намалување на нивните цени затоа што и цената на нафтата осетно се намали. Интересен е примерот на конкретна мерка на кинеската влада. Затоа што им се намалил извозот во земјите од ЕУ, Кина од 1јануари 2009 година за 90 отсто го намалува контејнерскиот транспорт до Англија“, рече косопственикот на конфекцијата „Ангел“, Ирена Јакимоска. Меѓу мерките што треба да помогнат конфекционерите го посочија и потпишувањето на спогодбата за кумулативно право меѓу Македонија и Турција.
„Ако се потпише таа спогодба, фирмите од ЕУ ќе можат да ги носат нивните конфекциски единици да се изработуваат кај нас. Со тоа не ќе мора да плаќаат 17 отсто во нивните земји како досега. Така ние ќе бидеме поевтини или на рамниште на Бугарија, која е членка на Унијата“, заклучи Васко Мариноски, сопственик на конфекцијата „Кули“.
На средбата на прилепските текстилци беше речено дека од околу 2.500 вработени во 25 поголеми и дваесетина помали фирми, поради немањето работа, околу 1.000 работници моментално седат дома на неплатен одмор. (Мн.Т.) |
