Уредените плажи летово се хит на охридската ривиера
Повеќето плажи се средени со вкус, имаат модерни реквизити и богата дневна забава
Симон Илиевски
ОХРИД - Уредените плажи што пред две години државата ги даде под концесија и летово се хит на охридската ривиера. Дел од концесионерите велат дека многу вложиле за нивно уредување и дека периодот на користење е премногу кус за да ја вратат инвестицијата. Сепак, судејќи според посетеноста и цените на услугите, тие не треба да се жалат, бидејќи летово ќе имаат добра туристичка жетва. Гостите се со поделени мислења. Едни велат дека треба да има уредени и евтини плажи. Други, пак, се за полуксузни плажи кои по уреденоста и понудата треба да бидат слични на оние во развиените туристички центри.
„Летна шема е да се биде на некоја од уредените плажи. Повеќето од нив се средени со вкус, имаат модерни реквизити и богата дневна забава. Тука може да се видат познати лица, но тоа е можност и да те видат - што е многу важно за младите луѓе“, вели Ени од Скопје, честа посетителка на плажата „Куба либре“. Таа објаснува дека слично како во Скопје се знае кое друштво на која плажа оди за да може да се развие муабет и да се слушне некој нов трач.
„Цените на реквизитите и пијалаците на плажите се различни и се формираат според пресметките на сопствениците. „На плажата ’Акапулко‘, што се наоѓа по хотелот ’Метропол‘, пивото чини 60 денари, исто толку се плаќаат газираните сокови, а сендвичите од 70 до 80 денари. Најмувањето лежалка и чадор за сонце се плаќа 120 денари. Плажата располага со сопствен паркинг простор“, вели Љупчо Нечковски, концесионер на плажата „Акапулко“. Според него, посетеноста е добра и доколку продолжи со ист интензитет може да се очекува годинашнава сезона да биде поуспешна сезона од минатогодишната.
Посетителите, кои пред се' се млади луѓе, велат дека покрај пристојните цени, на некои од плажите има и доста солени цени. Така, пивото на некои плажи се продава по 120 или 140 денари, а уште поскапи се увозните пијалаци. Кога се'ќе се собере, за мало, неколкучасовно задоволство на плажите може да се потрошат од 300 до 1.000 денари.
Младите охриѓани не се премногу воодушевени од убаво уредените плажи.
„Плажите се супер и таму може да се види како се забавува убав свет. Но, ние сме хендикепирани што не можеме секој ден да ги посетуваме, бидејќи е многу скапо. Тие во Охрид доаѓаат по седум до десет дена, а ние за истите пари што тие ќе ги потрошат треба да поминеме цело лето“, објаснува охриѓанецот Ѓоко Митески. То�� со другарите дневно обиколува по неколку плажи, па вели, доколку некое девојче му фрли заводлив поглед, од златните резерви ќе извади некој денар за да порача пијалак и да почне разговор.
Слично се чувствуваат и оние кои доаѓаат семејно, со мали деца. Тие се лоцираат на неуредените плажи каде што има многу отпадоци. Затоа велат не им е многу пријатно да ги гледаат соседите кои на меки лежалки на жешкото сонце се разладуваат со скапи коктели. Со иронична насмевка објаснуваат дека, сепак, добро е да има понуда за сечиј џеб, слично како што е и во другите места во светот.
Министерството за транспорт и врски минатата година под концесија издаде 12 плажи на користење за две години, со можност за продолжување на договорите за уште две години. Тоа се покажа како добар потег и битно ја освежи охридската туристичка понуда.
Во локалната самоуправа коментираат дека слично треба да се уреди целото крајбрежје од Охрид до Пештани, но концесиите, наместо државата, да ги дава општината. Сепак, локалната власт како добар домаќин ќе ги вложи парите од концесионерите во подобрување на инфраструктурата и во туристичка пропаганда со која ќе се привлечат и странски туристи од кои сите добро би заработиле. |
