Претходен број

Бесплатни учебници само социјално загрозени семејства

За основците и за средношколците бесплатни учебници ќе има дури од идната година

Жаклина Хаџи-Зафирова

Бесплатни учебници од оваа година ќе добијат само децата од социјално загрозените семејства, за кои Владата одвоила 250 милиони денари. Посебна помош за овие семејства, според најавите на министерот за образование, Перо Стојановски, предвидена е и со владиниот проект „Условни парични трансфери“, со што се предвидува да им се платат и трошоците за школување на овие деца.

Од Министерството не можат да потврдат што ќе се случува со старите учебници кои можеа да се купат на тезги или да се препродаваат, дали и тие ќе можат да се користат во иднина или, пак, ќе бидат забранети од идната учебна година.

Нема информации зошто доцни проектот за бесплатни учебници за сите ученици. Министерството единствено соопштува дека основците и средношколците од идната учебна година ќе добијат бесплатни учебници што ќе можат да ги користат и генерациите по нив.

Бесплатните учебници се предвидени во новиот Закон за учебници за основно и за средно образование што беше донесен минатиот месец, со кој се прецизираат начините како ќе се користат новите учебни помагала, но овој закон ќе почне да се реализира од идната, а не од претстојната учебна година.

Секој основец и средношколец ќе добие по еден комплет учебници. Учебниците од прво до четврто одделение ќе може да ги користат и втората генерација ученици, а потоа ќе се печатат нови. Учениците од петто до осмо и средношколците ќе учат од истите книги три години, а по завршувањето на третата генерација ќе има нови учебници и за нив.

Министерот за образование и наука, Перо Стојановски, најави дека Министерството ќе ги покрие сите трошоци за печатење на учебниците. „Откако Министерството ќе ги откупи авторските права на избраните ракописи, ќе ги преземеме и сите трошоци за печатење и грижата за тиражот. Издавачките куќи веќе нема да се јавуваат на конкурсите за учебници, туку авторите. Ова е направено за да се обезбедат рамноправни услови за сите што сакаат да конкурираат со свои ракописи“, вели Стојановски.

За бесплатните учебници ќе одлучува посебна национална комисија што ќе биде составена од 18 члена. Членовите на комисијата ќе ги именува и разрешува Владата.

Портпаролката во Министерството за образование, Маја Корубин, вели дека наставниците се должни да им укажат на учениците и на родителите дека учебниците не смеат да се оштетуваат.

„Доколку ученикот не го врати комплетот или го врати оштетен, родителот или старателот ја надоместува вредноста на комплетот со плаќање 70 отсто од каталошката вредност на учебникот. Ако, пак, се промени наставниот план или програма или доколку има измени или дополнување на повеќе од 30 отсто во содржините, Педагошката служба објавува конкурс за нов учебник“, вели Корубин.

Со идејата за бесплатни учебници издавачките куќи повеќе ќе немаат право да конкурираат со учебници, туку тоа ќе го прават авторите. Иако образложението на надлежните е дека со тоа сакаат да ја спречат корупцијата, сепак, прашање е колку и како ќе се спречи појавата авторите сами да си ги нудат учебниците во училиштата и притоа да нудат и провизија со оглед на фактот што, најверојатно, повторно ќе може по секој предмет да се користат по три учебници.

Проектот за бесплатни учебници кој годинава ги израдува родителите не е нов, бидејќи практиката за доделување бесплатни книги прв пат беше воведена пред десетина години во времето на владата на Бранко Црвенковски, но траеше кратко.