Итната помош во Штип работеше на свеќи
ШТИП - Експлозија на централна трафостаница во Штип прексиноќа цел час го остави градoт без струја. Штипјани ги осветлија домовите со свеќи од 22,30 до 23,25 часот. До вчера не беше позната причината за експлозијата и хаваријата на трафостаницата, а од ЕВН - ЕСМ информираа дека работат на утврдување на причините, иако првичните резултати укажувале на дефект.
Поради ненајавениот мрак, во Службата за итна медицинска помош при Здравствениот дом во градот цел час се работеше на свеќи. Струја снема и во Општата болница, но таму, според зборовите на директорот д-р Панче Пуздерлиски, автоматски биле вклучени агрегатите.
Во текот на вчерашниот ден повеќе домаќинства се жалеа на оштетени електрични уреди поради што планирале да побараат обесштетување од ЕВН - ЕСМ. Прво им дошла пресилна струја, а потоа градот потонал во мрак. (И.Б.) |
