Заедничките пари ќе одат за Тетовскиот универзитет
ТЕТОВО - Средствата за капитални инвестиции на јавните универзитети во Македонија треба да се насочат кон најприоритетните потреби. Потребно е да се подобри комуникацијата меѓу универзитетите. Професорите треба да држат предавања и на другите универзитети, не само заради промена на средината туку и заради поквалитетна настава, зголемување на платите... Ова беа само дел од прашањата на кои вчера на Државниот универзитет во Тетово расправаа ректорите на јавните универзитети во земјава - Сади Беџети (Тетово), Велимир Стојковски (Скопје), Златко Жоглев (Битола) и Сашо Митров (Штип).
Според министерот Перо Стојановски, било договорено еднаш месечно да се одржуваат работни состаноци на вакво ниво. Инаку, соработката меѓу јавните универзитети во Македонија се официјализира со ректорска управа, а за прв претседател беше избран Златко Жоглев. Според Сади Беџети, ректорите вчера се договориле во сферата на капиталните инвестиции, средствата од сите четири универзитети во износ од 1,7 милиони евра да се насочат кон Тетовскиот универзитет. Тие ќе бидат наменети за враќање на направените долгови, како и за продолжување на доградбата на објектите наменети за правен и економски факултет. Овие објекти треба да бидат готови до почетокот на идната академска година, за што ДУТ ќе добие дополнителни 700.000 евра од Министерството за образование. (Г.Е.) |
