Кина сака да стане петти инвеститор во светот

Кина планира во текот на годинава да стигне до петтото место во светот според обемот на директни инвестиции во други земји, се наведува во документ на кинеското Министерство за трговија, чии делови објавува весникот „Чајна дејли“. Според прогнозите на Министерството, во текот на оваа година Кина би требало во странство да инвестира 56 милијарди долари, со што на листата на најголеми глобални странски инвеститори би се поместила од 12. на петтото место. Во последните осум години обемот на директни кинески инвестиции во странство е зголемен за 50 проценти. Раст на инвестициите е регистриран дури и за време на кризата во текот на минатата година, со што на кинеските компании лани отпаднале 5,1 отсто од вкупните странски инвестиции, кои изнесуваа 1,1 трилиони долари. (МИА)