Германците бараат поголеми плати

Откако во првата половина од годината германската економија оствари изненадувачки висок раст, синдикатите почнаа да бараат повисоки плати за вработените. Експертите повикуваат на претпазливост. Синдикатот ИГ Метал, на пример, најави дека, најверојатно, ќе побара покачување на платите од 4,5 до 8 отсто. Михаел Гремлинг од Институтот за германското стопанство смета дека најважно треба да биде да не се намалува бројот на работниците. „Секако, доколку постои економски оправдан раст, може да се искористи. Но, треба да се внимава, бидејќи зголемувањето на платите може да доведе и до кратење на работните места, кои сега стојат на стаклени нозе. На патот до закрепнување состојбата се нормализираше. Затоа треба да бидеме претпазливи при одредувањето на економските можности. Пред една година оваа дискусија беше невозможна. Тогаш на прво место беше одржување на вработувањата. Така треба да остане и понатаму“, предупредува Гремлинг.

Ифо-индексот во август порасна по трет пат едноподруго, претпријатијата се презадоволни. Германската економска ефикасност во вториот квартал порасна за 2,2 процента, а во цела година може да достигне до 3,5 проценти, што би било повеќе од просечниот раст пред кризата, кој изнесуваше само два процента. „Изненадени сме од особено добриот развој во првата половина од годината. Ова темпо од првите шест месеци на 2010 година нема да можеме да го одржиме во втората половина“, вели Гремлинг. И Улрих Катер, главен економист на Дека банк, повикува на претпазливост. „Вториот квартал донесе економски раст од 2,2 процента. Американците имаат навика да вршат годишна пресметка, и ако го сториме тоа, ќе достигнеме пораст од девет проценти, што се кинески услови. Тоа не може да се одржи, но ние се' уште се надеваме на солиден раст од околу половина процент во последните два квартала. Тоа е добро за закрепнувањето на германската економија, меѓутоа, не е повод за еуфорија, како во вториот квартал“, смета Катер. (Дојче веле)