СДСМ: Власта не ги оствари економските ветувања

ВМРО-ДПМНЕ не ги оствари своите економски ветувања. Потпретседателот на СДСМ, Зоран Јовановски, на вчерашната прес-конференција спомна повеќе од нив: Регионална даночна академија за обука на даночниците, чие формирање се пролонгира до 2012, Бизнис-академијата за менаџерско образование, „Вардарска Долина“ и ангажирањето на економските промотори... „Ќе заврши и 2010, странски инвестиции во Македонија доаѓаат многу помалку во споредба со другите земји во регионот. Иако се трошат значителни пари, проектот е лошо осмислен и целосно неуспешен“, оцени Јовановски.

Според него, без резултат е и ветувањето за доизградба на магистралните водови за природен гас. Не е почната ниту изградбата на хидроцентралите „Чебрен“, „Галиште“ и „Бошков Мост“. „Најдобар показател за неостварените енергетски инвестиции е ТЕЦ ’Неготино‘, која е едноставно заборавена“, рече Јовановски.

На барање да ги коментира последните информации за проневера на пари во „Телеком“, кои биле користени за плаќање на македонски политичари, со оглед на фактот што во тој период на власт беше СДСМ, Јовановски, истакна дека сознанијата се однесуваат на многу подолг период порано. „И СДСМ е заинтересиран и ќе инсистира да се разоткрие целата листа на поврзани лица со овој случај и сите инволвирани низ судска постапка да се соочат со правдата“, рече тој. (МИА)