Виолета Бошкоска и Соња Трачуловска се обидуваат да разјаснат дали нивните сопрузи си наштетиле еден на друг со изјавите

Гордана Дувњак

Дали присуството на Виолета Бошкоска во Соборниот храм и палењето свеќа беше провокација или само искрена желба на жена што минува(ла) низ истото, која сака несебично да се придружи во молитвите за спас на единствениот македонски затвореник во Хашкиот трибунал?

Во време на кулминација на меѓусебни обвинувања „кој кого накодошил за настаните во Љуботен“, сопругата на ексминистерот за полиција завчера се најде во истата црква и со иста намера со приврзаниците и сопругата на Јохан Тарчуловски. По излегувањето на Бошкоска од Соборниот храм, Соња Тарчуловска во изјава за медиумите изјави дека е шокирана од нејзиното присуство и оти смета дека таму не и' било местото на жената на ексминистерот.

„Виолета не беше повикана, сама си дојде и тоа за да испадне жртва. Ве молам, не ставајте ме во ист кош со семејството Бошкоски. Сево ова негативно и емотивно ми отежнува, затоа што чекаме пресуда. Значи, грижата на совест и сопствените гревови нека си ги тераат на друго место. Замолувам да не се прави циркус од ситуацијава, затоа што доволно видовме досега. Нека ме остават на мира, барем да се помолам за слободата на Јохан“, изјави за медиумите Тарчуловска.

На ваквите обвинувања Виолета Бошкоска вчера кратко одговори: „Црквата е божји храм и за да одиш таму не ти треба ничија дозвола за да се помолиш. Немав намера никого да провоцирам, туку само сакав да се помолам, затоа што нашето семејство има разбирање и знае низ што поминува Јохан. Му посакувам што поскоро да излезе на слобода“.

Но, и двете сопруги не одолеаја на предизвикот и самите да се впуштат во расчистување на дилемите дали со сведочењата пред хашките истражители, двајцата македонски државјани, коишто единствено одговараат за воениот конфликт од 2001 година, си наштетиле еден на друг или не. Директен повод за последните искричења е излегувањето на виделина на наводната изјава на Бошкоски дадена во судот во Пула.

По демантот на лидерот на Обединети за Македонија и неговата сопруга Виолета дообјасни дека не станува збор за изјава, туку ��а читање службен документ на Министерството за одбрана. Но, во исто време таа и' порача на сопругата на Тарчуловски дека поседува четири изјави на Јохан насочени против нејзиниот маж.

„Ја повикувам Тарчуловска да се видиме во четири очи и да и' ги дадам да ги види четирите изјави од кои се гледа дека нејзиниот сопруг сведочел лошо против Љубе. Во овој момент не сакам тоа јавно да се објавува, затоа што треба да се причека исходот од жалбената постапка“, додаде Виолета Бошкоска во изјавата за „Утрински весник“.

Сопругата на Тарчуловски, пак, оцени дека е повеќе од јасно дека изјавата на Бошковски го испратила Јохан во затвор.

„Нели знаеме која пресуда ја доби Јохан и зошто по таа изјава се' се поврзува и се поклопува. Не посакувам никому лошо, господинот (Бошкоски) со таа изјава и тоа размислување, сам себеси се осуди. И да го цитирал тој документ, зошто тој го направил тоа. Значи, ако министерството го издало тој документ, значи тие веќе го имале, нема потреба со своето присуство и усно да го потврдуваш дека е тоа така. И не мора да значи дека тоа е така. А тој е свесен и знае дека тоа не беше така“, изјави Тарчуловска за скопската телевизија А1. Таа нагласи дека „Јохан е чист“.

Бошкоска вчера ни изјави дека не е точно и оти еднострано ги прекинале контактите со семејството на Тарчуловски, само за да се спаси нејзинот сопруг.

„Во мај телефонски се најавивме кај Соња за да ја видиме неа и децата. Неколкупати разговаравме и таа се согласи. Отидовме таму со цвеќе и подароци, но бевме непријатно изненадени кога во договореното време таа не ни се јави на мобилниот телефон за да не' пречека и да ни каже каде точно живее. Преку посредници разбравме дека Соња се премислила, бидејќи нејзиниот сопруг наводно и' забранил да се видиме“, потенцира сопругата на Љубе Бошкоски.