Без дозвола нема прекопување улица

Градот Скопје и општините ќе ги укинат годишните дозволи за вршење прекопи на улиците што ги добиваат фирмите, договори Координативното тело на градоначалници на скопските општини, на вчерашната редовна средба. Во иднина, Телеком, ЕВН, но и градските јавни претпријатија кои имаат подземна мрежа инсталации, за секој прекоп на улица или на друга јавна површина ќе треба да направат посебен проект и за тоа да добијат дозвола од Градот и од општините. Во договорите ќе бидат предвидени и посебни казнени клаузули за фирмите кои по ископувањето нема да ги вратат површините во првобитната состојба.

Градот, најави градоначалникот Коце Трајановски, ќе работи и на системот ГИС, со кој конечно ќе биде уредена подземната мрежа инсталации. Тој истакна дека со сите компании што имаат подземни водови, Градот има остварено првични контакти заради размена на документација, потребна за оформување на подземниот катастар.

Трајановски најави и демонополизација на концесионирањето со билбордите низ градот, од каде што локалната власт очекува многу поголеми приходи во иднина. (С.Н.)