РОНИ ВУД

Го учев Слеш да свири гитара

Рони Вуд, гитаристот на „Ролинг стоунс“, изјави дека на Слеш, некогашниот член на групата „Ганс ен роузис“, му давал совети за свирење гитара. Во разговорот за радиостаницата Абсолут класик рок, Вуд го пофали помладиот колега и раскажа како му објаснил некои детали во врска со свирењето.

„Слеш? Се сеќавам кога беше дете и ме шпионираше додека свирев. Го научив неколку трикови, а сега јас учам од него. Одличен е во тоа. Прекрасен човек, добар соработник и извонреден музичар кој везе со гитарата. Слеш е многу талентиран и секогаш сум среќен кога свириме заедно. Ќе се појави и на мојот најнов албум“, рече 62-годишниот британски музичар.

Вистинското име на 44-годишниот Слеш е Сол Хадсон, беше главен гитарист на „Ганс ен роузис“ од 1985 до 1996 година, а оттогаш наваму свиреше во бендови како „Слеш’с снејкпит“ и „Велвет револвер“. Од неодамна во продажба е неговиот прв соло-албум, на кој гостуваат многу легендарни рокери.